Haugesund Sparebank legg ned kontoret i Sveio

Tidlegare var det to tilsette ved kontoret. Etter at ei gjekk over i annan jobb, og ei gjekk ut i fødselspermisjon, blei dei ikkje erstatta. Løysinga blei å midlertidig stenga banklokala, men samtidig tilby kundane å bestilla møter med andre rådgivarar frå banken som kom til Sveio.

Avgrensa etterspurnad

I ei pressemelding onsdag morgon skriv Haugesund Sparebank at det har vore svært avgrensa etterspurnad etter kundemøter på Sveio-kontoret. Ifølge banken har kundar med bustadadresse i Sveio stort sett brukt banken sine kontor i Haugesund sentrum, på Amandasenteret eller i Tysvær.

Sveio-kundane har også etter fusjonen med Tysnes Sparebank 1. september i år, kunna nytta banken sitt kontor på Stord.

Held fram med støtte

Det kan vera ei utfordrande øving å organisera eit kontor med berre to tilsette, og både for banken og kundane ser me det som mest tenleg å samla våre rådgivarar i større fellesskap. Me ser difor at det etter 10 år med kontordrift i Sveio sentrum er naturleg å avvikla dette kontoret, skriv banken vidare.

Sveio er og blir et svært viktig område for Haugesund Sparebank, blir det understreka. Banken vil halda fram med å støtte lokale lag og foreiningar i Sveio slik dei har gjort i mange år, og dei vil halda fram med sponsoravtalene sine.

– Like til stades som før

– Me kjem til å vera like til stades som før, og vårt engasjement i Sveio står like sterkt, seier Rolf Lillehammer, banksjef personmarknad.

Kundane beheld sin faste kunderådgivar og den samme mogeleigheita til personleg oppfølging som tidlegare.

– Ved å samla kompetansen får me eit sterkare og meir robust miljø, noko som gjer oss i stand til å gi kundane enda betre oppfølging. Dette er ei naturleg organisering basert på korleis kundane brukar oss i dag, seier Lillehammer.