No er båtvraka fjerna

– Eg er svært godt nøgd med dette og imponert over måten Sveio kommune har handtert denne saka på, seier leiaren i Vigdar Grunneigarlag John Ragnar Tveit.

Grunneigarlaget har vore pådrivar for å få båtvraka fjerna. Fleire privatpersonar har også sendt bekymringsmeldingar. Vestavind skreiv om dei etterlatne båtane første gong i fjor vår. Lokalavisa var også til stades då Viking Gjenvinning Karmøy tok fatt på arbeidet tysdag.

Stort oppdrag

– Det er Sveio kommune som har gitt oss oppdraget med å fjerna båtane, stadfestar Mats Skjærseth, dagleg leiar i Viking Gjenvinning Karmøy.

Med seg på jobben i Sveio hadde han kollegaene Sylvester Bros og Vidar Haugen.

– Me skal henta ti-elleve båtar i alt. Det er første gong me har fått i oppdrag å henta så mange på ein gong. Til vanleg hentar me eitt og eitt vrak, fortel Skjærseth.

Firmaet han leiar er godkjent for å ta imot utrangerte fritidsbåtar. Dette er ei teneste som er gratis for båtar opp til tre tonn. Firmaet hentar båtar frå heile Rogaland og Sunnhordland, men opererer i praksis mest på Haugalandet.

Til gjenvinning

– Båtane me hentar her i Sveio og elles blir tatt med til anlegget vårt på Avaldsnes. Der blir alt av metall demontert før skroga blir knutste. Alt materiale blir sendt til gjenvinning, forklarar Skjærseth.

Med seg til rasteplassen ved Vigdarvatnet hadde han og medarbeidarane hans lastebil med tilhenger. Dei fekk såleis med seg alle vraka i eitt lass.

Ukjende eigarar varsla

Dei etterlatne båtane ved Vigdarvatnet var uregistrerte og umerka. Korkje grunneigarlaget eller kommunen har oversikt over kven eigarane var. Før vraka blei henta, klistra kommunen lappar på kvar einskild båt med varsel om at vraka blei fjerna om dei ikkje blei henta av eigarane. To båtar skal ha blitt henta før fristen gjekk ut.

John Ragnar Tveit i grunneigarlaget håpar no at dei er ferdige med denne saka, og at problemet med herrelause og etterlatne båtar ikkje dukkar opp igjen.