– Fantastisk bra løype

Arrangementet markerte starten av løpssesongen for både Rogaland og Hordaland orienteringskrets. Ein slik felles oppstart er nytt av året og responsen blant vestlandsklubbane var god. Rundt 200 løparar fordelt på 20 lag fann vegen til Auklandshamn laurdag 6. april.

Leiar for Sveio O-lag, Thomas Førde, har vore med sidan orienteringslaget blei stifta i 1967. Han kan fortelja at det er mange år sidan sist det blei arrangert løp med så mange deltakarar i Sveio. I 2013 var det Vestlandsmeisterskap i orientering på Vandaskog med rundt 300 deltakarar.

Forarbeid

Førebuingane til laurdagens orienteringsfest i Auklandshamn starta for mange månadar sidan.

– Løypelegginga tar lengst tid, innrømmer Førde, og minner om at alle postane som er plassert ut i terrenget må hentast inn igjen i etterpå.

Det førre løpskartet for området blei laga i 2004. Det er internasjonale normer og krav til detaljrikdom. Nytt løpskart blei derfor tinga til anledninga og medlemmer av Sveio O-lag har synfart terrenget og planlagt rutene til dei åtte ulike løypene. Den kortaste er 940 meter og den lengste 3840 meter, i luftlinje vel å merka.

Ein kunst

Kjetil Fiskå kan fortelja at det er vanleg å legga til 20 prosent på luftlinjelengda for å finna omtrentleg løpt distanse. Det er mykje å tenka på for å få til ei god løype.

– I eit mellomdistanseløp skal det ikkje vera for lange strekk mellom postane. Det må vera tydelege ledelinjer til dei yngste og retningsendringar for å gjera det meir krevjande for dei erfarne, sa Fiskå.

Dugnad

15 funksjonærar var i sving sjølve løpsdagen og tok seg av alt frå parkering og kioskdrift til sekretariat og løpsleiing. Kiosken kunne skilta med nytrakta kaffi, pølser i brød og heimelaga vaflar.

Brørne Kristian og Johannes Sandvik Førde hadde mellom anna ansvar for påmelding, tidtaking og resultatføring. Dei kom reisande frå Bergen og Oslo for å hjelpa til. Dei har mange gode minner frå tida med orientering i barndomen og held framleis på med turorientering.

Anne Grutle, som sjølv starta med orientering då ho var 13 år, var med og hjelpte dei yngste deltakarane. Ein av dei som ville prøva seg som orienteringsløpar var Hugo Rossehaug frå Auklandshamn. Han fekk ei kort innføring i kartlesing før det bar vidare i løypa. Dei yngste fekk starta frå klokka 14.00, ein time før første ordinære start.

Ein suksess

Det var tett med folk rundt start-teltet ved bedehuset i Auklandshamn då klokka nærma seg 15.00. Ei og ei pulje med løparar frå dei ulike løypene blei sendt ut med eitt minutts mellomrom. Med seg hadde dei ei lita tidtakarbrikke som dei måtte skanna på kvar post. Dei som la ut på den lengste løypa, måtte finna 15 postar før dei kunne setta kursen mot mål ved Auklandshamn skule.

Arne Johannesen sprang løype 3 i klassen H 60- og var full av lovord etter målgang.

– Fantastisk bra løype, retningsendringar og kjekt terreng.

Dette var ikkje første gong Johannesen hadde sprunge i terrenget rundt Auklandshamn og han føretrekk vår framfor haust.

– På hausten er det meir og høgare gras, mykje verre å ta seg fram.

Verdsmeisteren raskast

Jon Duncan let også vel om arrangørane og løypene i Auklandshamn. Verdsmeisteren i orienteringsstafett for Storbritannia i 2008 blei raskaste løpar denne dagen. Han fullførde den lengste løypa på 30 minutt og 13 sekund.

Her finn du resultata frå Auklandshamn

Bli med!

Mange klubbar slit med rekrutteringa. Vestlandspremieren samla folk frå både Rogaland og Hordaland slik at det blei mange som stilte til start. Orienteringssporten har rom for alle, uansett alder og nivå.

Sjølv om det er ei stund sidan Sveio O-lag har hatt organiserte løpstreningar, merkar dei ei stor interesse for tur-orientering. Sveio Orienteringslag har 95 postar fordelt rundt om i Sveio kommune. Gå inn på nettsida til O-laget for meir informasjon.