nyhende
– Viser kor viktig det er med VHF om bord
– Naudmeldinga som kom frå ein fritidsbåt ved Ryvarden 17. mai viser kor viktig det er å ha VHF-radio også om bord i fritidsbåtar. Dette seier skipsførar Vidar Johannessen på redningsskøyta «Bergen Kreds».
«Bergen Kreds» rykka ut frå Haugesund etter at det ved 15.15-tida 17. mai blei sendt ut mayday-melding frå ein fritidsbåt i området ved Ryvarden fyr i Sveio. Då redningsskøyta kom fram, hadde fritidsbåten kome seg til kai i Mølstrevåg. Han fekk følgja i redningsskøyta sitt kjølvatnet i sakte fart over Sletta til Haugesund.
Johannessen seier at det var ein ung og lite sjøvand båtførar som var på veg sørover då han blei overraska av nokre store sjøar ved Ryvarden. Båten fekk slagside, og føraren blei redd og sende ut naudsignal. Etter Johannessen si vurdering var aldri vedkomande i stor fare. Båten var ein speedsjark og er ein god sjøbåt, seier han.
– Men det er teikn på godt sjømannskap å be om hjelp når ein meiner at situasjonen er ute av kontroll. Det er også ein stor fordel å melda frå via VHF i staden for telefon, seier skipperen på redningsskøyta.
Skip i nærleiken følgde med
Naudhjelp er dessutan gratis i Noreg, så ingen treng vegra seg for å be om hjelp av frykt for skyhøge rekningar etterpå.
Når naudmeldinga blir sendt på VHF, som i dette tilfellet, kan både kystradiostasjonen og eventuelt andre båtar i nærleiken høyra det som blir sagt. Båtar i området kan gå til assistanse. Dei kan også kommunisera både med havaristen og med Hovudredningssentralen.
I dette tilfellet var lasteskipet «Skog» i nærleiken. Mannskap om bord i dette skipet følgde med fritidsbåten som hadde sendt ut naudsignal og heldt redningsleiinga orientert.
