Veit du kva dag det er i dag?

Vaflar har røter tilbake til mellomalderen, og det vart utvikla vaffeljern i Tyskland og Nederland på 1300-talet. Det første elektriske vaffeljernet kom på marknaden i 1911.

Mange land har sine vaffelspesialitetar, men i Noreg og Sverige er det dei tynne hjarteforma vaflane som har vore dominerande.

Vaffeldagen skal ha sitt opphav i Sverige, og heng samen med Vårfrudagen (Maria bodskapsdag), til minne om at jomfru Maria fekk bodskapen frå engelen Gabriel om at ho skulle føde eit barn. Historia fortel at Vårfrudagen slurvete uttalt vart til Våffeldagen, ifølgje Matprat.

Sjømannsvaflar

Sjømannskyrkjene verda over har vore ein ynda stad for nordmenn i utlandet å nyte vaflar. Så kvifor ikkje prøve oppskrifta på vaflar frå sjømannskyrkja i København, som er kåra til den beste vaffeloppskrifta i 2008, 2011 og 2012:

2 egg

1 dl sukker

2 dl skumma kulturmjølk

1 1/2 dl mjølk

1 dl vatn

350 g kveitemjøl

1 ts bakepulver

1 ts vaniljesukker

1/2 ts natron

1/2 ts malt kardemomme

125 g smelta smør

Visp egg og sukker lett og ha i skumma kulturmjølk, men hald igjen ein halv dl.

Bland saman mjøl, kardemomme, vaniljesukker og bakepulver i ein annan bolle. Bland så inn vekselvis det tørre, vatn, mjølk og smelta smør.

I den siste halve desiliteren skumma kulturmjølk blandar du inn natron. Lat natron bruse ferdig i mjølka før du tilset den i resten av røra. Ikkje rør mykje etter at natronmjølka er tilsett, for då blir vaflane seige. Lat røra svelle litt før steiking.

Steik vaflane i varmt vaffeljern. Avkjøl på rist. ( Opplysningskontoret for brød og korn )

Vaflar til middag

I Belgia og USA er det dei store og tjukke vaflane som gjeld, men i Noreg har det vore mest populært med tynne vaflar med syltetøy og rømme – om ein ser bort frå vaflar med pølse, spesialiteten frå Moss.

Det er likevel fullt mogleg å lage vaflar med litt meir mat i. På Kafé Sult på Hamsundsenteret på Hamarøy serverer dei svarthavrevaflar: Edvardas vaffel med ishavsrøye, Sellanraavaffel med spekeskinke og geitost og Rosas favoritt med iskrem og knuste bringebærdrops.

Om du har lyst å prøve deg på vaffel til middag, kan du teste denne oppskrifta frå Matprat:

Potetvaflar:

4 egg

4 dl mjølk

2 dl kveitemjøl

1 dl potetmjøl

1 ts salt

1 ts bakepulver

3 ss smelta smør

5 poteter

Tilbehøyr:

200 g steikt bacon

2 dl ruccola

0,5 stk. raudløk

ca. 1,5 dl lettrømme

Bland alle ingrediensane til vaffelrøra.

Skrell potetene og riv dei på eit grovt rivjern. Klem ut vatnet og bland dei rivne potetene i røra. Lat røra svelle i 15 minutt. Rør i ho av og til slik at ikkje potetene blir misfarga.

Steik potetvaflane ved god varme.

Server med salat, sprøsteikt bacon og ein klatt rømme.

(©NPK)