Usemje kan vera uheldig for Sveio

Tre månadar har Telemarksforsking brukt på å jobba fram til ulike fordelar og ulempar for Sveio som del av både Vestland og Rogaland fylke.

Kort oppsummert har Sveio mange interesser mot Haugalandet, spesielt arbeidsmarknaden, interkommunale samarbeid og statlege tenester.

– Eit fylkesskifte kan vera ein fordel. Rapporten konkluderer med at fordelane er større enn ulempene. Det er ein fordel å vera ein del av det fylket ein funksjonelt er ein del av, og kunne påverka demokratisk. Det gjer det enklare å planlegga og handtera felles utfordringar, seier forskaren.

Engasjerte bønder

Utgreiinga omfattar mange tema og problemstillingar. Torsdag kveld blei dei viktigaste momenta løfta fram. Etter ein kort pause, var ordet fritt blant tilhøyrarane.

– Det var flest kommentarar som gjekk på landbruk. Det var kanskje ikkje uventa sidan landbruket er viktig i Sveio, og det er usikkerheit knytt til effektar på enkelte av støtteordningane. Landbruk er derfor òg eitt av dei områda som det vil bli fokusert nærare på i den vidare prosessen, seier Brandtzæg.

Usemje

– Kva kan den største ulempa vera med å byta fylke?

– Eg er usikker. Landbruk er ei viktig næring, noko av tilskotsordningane vil sjå dårlegare ut i Rogaland, seier prosjektleiaren.

Han er klar over at mange nord i kommunen kjenner sterkare tilknytning til Sunnhordland og Vestland.

– Er det ueinigheit om kva ein vil, slik at det blir ei konflikt og steile frontar, kan det vera uheldig for Sveio si utvikling, seier Brandtzæg.

Tannklinikken

I presentasjonen blei tannklinikken i Sveio nemnt som den einaste fylkeskommunale arbeidsplassen i kommunen. Nokon har stilt spørsmål ved kva som vil skje ved eit eventuelt fylkebyte. Svaret er at Rogaland vil ta over klinikken.

– I utredninga har me ikkje fått signal om at det er noko fare med den i samband med fylkesskifte, opplyste Brandtzæg.