Ulykke på E39 – lastebil og MC involvert

SISTE: Tre personar var involverte i ulykka. Ein i lastebil og to på lett motorsykkel. Motorsykkelen og lastebilen har køyrt i samme fartsretning. Motorsykkel skal ha mista kontrollen og velta. Lastebil har svingt unna for å unngå å køyra i dei. Lastebilføraren er uskadd, opplyser politiet.

– De to personane på motorsykkelen er begge tatt med til sjukehus. Den eine i luftambulanse til Haukeland, og den andre med ambulanse til Haugesund. Eg kan ikkje seia noko om skadeomfanget. Vegen har vore stengt i vel ein time, men det er no manuell dirigering slik at trafikken går forbi ulykkestaden i eitt felt, seier innsatsleiar Christine Miljeteig til Vestavind.

Brannvesenet bistår med dirigering, og det vil gå ei stund før vegen blir opna i begge retningar igjen. I 20-tida rekna Miljeteig med at det i alle fall kom til å gå minst ein times tid til med manuell dirigering.

Klokka 20.24 melder politiet på loggen at Vegtrafikksentralen vil senda ulykkesgruppa for å hjelpa politiet med åstadundersøking av trafikkuhellet.

Meldinga om ulykka gjekk ut klokka 18.53, og då blei det opplyst at ulykka var i krysset Vågavegen/ E39.

– Det er meldt om eit trafikkuhell mellom ein lastebil og ein motorsykkel. Skadeomfanget er ukjent, opplyste operasjonsleiar John Ask i Sør-Vest politidistrikt.

E39 blei stengt som følge av ulykka, og det begynte raskt å danna seg lange køar. Luftambulanse skal ha landa.

Sør for Haukåskrysset

Vestavind sin fotograf melder klokka 19.35 at ulykkesstaden ikkje er i sjølve Vågakrysset. Men køen står forbi krysset i retning Tysvær.

Kort tid etter får Vestavind opplyst at ulykkesstaden er om lag ein kilometer sør for Haukåskrysset.

Politiet har sett ein bil i Haukås-krysset for å stoppa trafikken sørover frå krysset. Omkøyring er via Fv. 47 til Haugesund eller langs Ålfjorden.