nyhende
Tiltalt for drapsforsøk, må møta i retten i juni
Ein mann i 30-åra er tiltalt for drapsforsøk på Lyngholm i Sveio påskeaftan i fjor. Ifølge tiltalebeslutninga er mannen heimehøyrande i Haugesund.
Fornærma er ein politibetjent i Sør-Vest politidistrikt. Det var NRK som først omtalte tiltalen og melde at straffesaka kjem opp i Haugaland og Sunnhordland tingrett i juni.
Politipatruljen som rykte ut til Lyngholm i påska i fjor, skulle bistå i samband med eit helseoppdrag. Saka endra karakter då den no sikta mannen gjekk laus på ein politibetjent med machete samstundes med at han truga med drap.
Politimannen hadde verneutstyr og blei ikkje fysisk skadd. Etter åtaket med macheten brukte politiet elektrosjokkvåpen mot mannen og fekk hjelp til å overmanna han.
Fem hovudpunkt i tiltalen
Tiltalen mot mannen i 30-åra er utforma i fem hovudpunkt. Dei to første gjeld valdshandlinga med machete og trugsmålet om å drepa.
Det tredje punktet gjeld ulovleg tilvirking og oppbevaring av narkotika. Grunnlaget er 27 cannabisplanter på mellom 12 og 60 centimeter som politiet fann hos tiltalte søndag 9. april 2023. I tørka tilstand vog dei 1.783 gram. I tillegg oppbevarte mannen 137 gram cannabis.
Det fjerde tiltalepunktet gjeld brot på våpenlova og gjeld store mengder ammunisjon til ulike handvåpen.
Det femte tiltalepunktet gjeld brot på legemiddellova for oppbevaring av 84,88 gram kratom i ein bag.
Påstand om inndrag
Statsadvokat Thale Thomseth, som har utforma tiltalen, tek også atterhald om at det vil bli lagt ned påstand om inndraging av macheten som blei brukt under åtaket på politibetjenten. Det vil også bli lagt ned påstand om inndraging av andre knivar som politet beslagla under ransakinga tiltalte sin bustad.
Sidan fornærma i saka er tilsett i Sør-Vest politidistrikt, er denne saka blitt etterforska av Agder politidistrikt, og deretter oversendt til Rogaland statsadvokatembeter.
