nyhende
Talet på uføre i Sveio ned – men framleis høgt
Tal frå Nav viser svak nedgang i uføretrygda i Sveio i 2025, men kommunen ligg framleis over både fylkes- og landssnittet.
I desember 2025 var 11,7 prosent av befolkninga i yrkesaktiv alder i Sveio mottakarar av uføretrygd. Det er ned frå 12,0 prosent i 2024 og 12,1 prosent i 2023, viser kommuneoversikta til Nav Vestland.
Sjølv om utviklinga går svakt ned, ligg Sveio framleis godt over snittet i fylket. I Vestland var delen 8,9 prosent i 2025, ned frå 9,0 prosent året før. På landsbasis var delen 10,5 prosent, uendra frå 2024.
Auke over tid
Samanlikna med nabokommunar i Sunnhordland og på Haugalandet ligg Sveio (11,7) høgt. Til samanlikning hadde Haugesund 10,9 prosent, Stord 10,5, Fitjar 11,5, Etne 10, Bømlo 9,9 og Vindafjord 8,6 prosent. Berre Karmøy og Kvinnherad låg høgare enn Sveio med høvesvis 12,4 og 12,3 prosent uføretrygda. Kommunen med lågast del i Vestland var Sogndal med 6,3 prosent.
På fylkesnivå viser tala at talet på mottakarar av uføretrygd i Vestland gjekk minimalt ned frå 36.957 i 2024 til 36.827 i 2025 (-0,4 prosent). I eit lengre perspektiv viser det seg at nivået i Vestland samla har auka dei siste 10 åra, frå 31.477 i 2016 til 36.827 i 2025.
Små utslag i aldersgruppene
Fordelt på ulike aldersgrupper viser statistikken for Vestland små endringar frå 2024 til 2025. Dei tydelegaste finn ein blant 18-29-åringane, der talet gjekk ned med 2,7 prosent, medan det blant 30-39-åringane auka med 2,3 prosent.
Den største aldersgruppa blant uføretrygda var dei i alderen 50-59 år. Dei utgjorde om lag ein av tre uføretrygda i Vestland. Også denne gruppa gjekk noko ned frå året før, med 1,4 prosent.
