Sveioungdomen signaliserer iver og engasjement

Rådet har 17 medlemmer, inkludert leiar og nestleiar, fordelt på ungdom frå heile kommunen. I tillegg møter varamedlemmer på kvart møte, dei har tale- og forslagsrett, men ikkje stemmerett.

Ungdomsrådet kan senda saker direkte til ordføraren. Leiar og nestleiar får møterett i kommunestyre og formannskap. Medan andre medlemmer er valde til å møta i dei tre hovudutvala i Sveio kommune.

– Mitt råd er å stilla opp, vera positiv og jobba ilag, på den måten blir arbeidet både kjekkare og lettare. Eg synes ungdomane i Sveio er ekstremt flinke og dei kan få mykje gjort, seier sekretær for Sveio ungdomsråd, Svavar Fridriksson.

Dei unge er delte i to grupper – dei som går på ungdomsskulen, og dei som er mellom 16 og 20 år. I år er det svært mange nye fjes som ser fram til å vera ein del av ungdomsrådet.

Motiverte ungdomar

15 år gamle Sunniva Vikse er nyvald nestleiar og går nå inn i sitt tredje år i ungdomsrådet. Vikse fortel ho har sett opp til dei som har vore leiarar av rådet.

– Dei har gjort ein bra jobb og eg ønskjer at det gode arbeidet skal halda fram. Eg er motivert for å få eit aktivt ungdomsråd i Sveio og at ungdomane skal få vera med på å bestemma korleis ting i kommunen skal vera, det er jo trass alt me som skal ta over, seier Vikse.

Frida Hovland Jepsen (17) blei for rundt to år sidan stemd inn som varamedlem. No er ho fått rolla som fast medlem.

– Det er noko eg gler meg til. Som vara har ein ei god stemme, men når det kjem til stykket så er det dei som sit rundt bordet som har siste ordet. Å kunne ha ei stemme som blir høyrd er viktig, kor det å bruka den er enda viktigare, seier Hovland Jepsen som går andre året på vidaregåande.

LAN og nattcup

Under møtet torsdag blei det bestemt at Sveio ungdomsråd skal støtta juleballet med ekstra lys og lyd no i desember. Mange av medlemmene sa seg også villige til å jobba med LAN og nattcup arrangement.

– Det blei mykje diskusjon om skyss til og frå byen. Ungdomane slit med kor sjeldan bussane går, blant anna blei det trekt fram at dei av og til må venta i 3 1/2 time på neste buss, opplyser Svavar Fridriksson.

Drivkraft i kommunen

Til stades var også ordførar Linn Therese Erve, som kom for å gratulera og framsnakka ungdomsrådet.

– Ungdomsrådet er ein viktig arena for dykk til å påverka korleis både politiske saker og påverka tilbod til barn og ungdom i kommunen vår. Ungdomsrådet er ein drivkraft i kommunen.

Ordføraren minna også om at involvering og medvirkning er viktig.

– Dykkar meining er viktig for oss folkevalde. De er framtida vår, og me vil svært gjerne høyra dykkar syn på saker me har til handsaming. Eg vil gjerne invitera nytt ungdomsråd til neste kommunestyretmøte. Eg ser fram til godt samarbeid, og håpar de tar orde i både Hovudutval og kommunestyre.

Neste dato for Sveio ungdomsråd er sett til torsdag 9. desember.