Sveio kommune ber alle sjekke vassrøyrene sine

Vassforbruket i Sveio kommune har auka markant dei siste dagane. Kommunen trur dette har samanheng med at røyr blir øydelagde i samband med tining etter den kalde perioden med hadde rundt jul.

Kommunen ber no om hjelp frå hus- og hytteeigarar til å leite etter mogelege lekkasjar.

Ifølgje oppsynsmann for vatn og avlaup i Sveio, Torbjørn Larsen, er dei nemleg ikkje uvane med å finne til dels store skadar på bygningar når dei er ute for å lokalisere lekkasjar.

— Når vatnet står rett i taket over tid, blir det ikkje berre kostbart kommunen, som taper vatn, men også for hytteigaren som risikerer store vasskadar på bygningar.

For kommunen åleine utgjer vasstap på ein liter i sekund tusenlappar om lekkasjen ikkje blir reparert raskt.

Sentrum og Våga

Kommunen ser vasstap i fleire område i kommunen, men ifølgje Larsen er det spesielt rundt Sveio sentrum og i retning Våga dei ser at no går meir vatn enn normalt.

Det er ofte private stikkleidningar som er syndaren, og Larsen minner difor om at det er forbod mot å la vatnet stå og renne, slik mange har tradisjonen for å gjere for å prøve å unngå at røyr som ikkje er isolerte frys.

Kan miste sløkkjevatn og drikkevatn

I ytste konsekvens råkar vasstapet brannberedskapen, i form av at ein mister tilgang på sløkkjevatn.

Også drikkevassforsyninga kan bli råka, skriv kommunen på si nettside.

Kommunen får også ein ekstrautgift fordi mannskap må prioritere denne typen oppdrag.

— Det går ut over anna vedlikehald og gir etterslep av andre oppgåver me har, seier Larsen til Vestavind.

Kommunen har fire mann på leiting etter lekkasje denne veka.

— I samband med arbeidet kan folk oppleve at dei mistar vatnet i nokre minuttar, seier han.

Om nokon oppdagar at dei har øydelagde røyr blir eigarane oppmode til å kontakte røyrleggjar.