nyhende
Straumprisane stig – Sør-Noreg får årets høgaste pris onsdag
Tidleg onsdag morgon stig straumprisane til vêrs i Sør-Noreg. Både på Austlandet og Sørlandet blir prisen onsdag den høgaste så langt i år.
Mellom klokka 08.00 og 09.00 blir timeprisen på heile 3 kroner per kilowattime (kWh) på Sørlandet. På Austlandet blir den nesten like høg, på 2,7 kroner/kWh.
Sist straumprodusentane i Sør-Noreg fekk så godt betalt for straumen, var for nøyaktig eitt år sidan, nemleg 4. desember 2023.
Også kundar i Midt-Noreg og på Vestlandet må belage seg på ein høg pris i same tidsrom. Dei må ut med høvesvis 1,9 kroner/kWh og 2,3 kroner/kWh.
Nord-Noreg blir skjerma frå dei høge prisane. Der blir snittprisen i løpet av døgnet berre 12 øre/kWh.
Annonse
Prisane er venta å søkke utover dagen. Slik blir snittprisane:
- Austlandet: 117 øre/kWh
- Sørlandet: 133 øre/kWh
- Vestlandet: 96 øre/kWh
- Midt-Noreg: 41 øre/kWh
- Nord-Noreg: 12 øre/kWh
