Stortingskomité sa nei til erstatningsordning for Alexander Kielland-etterlatne

Det er klart etter at arbeids- og sosialkomiteen på Stortinget no har avvist to forslag om ei erstatningsordning.

Det eine er fremja av SV, Raudt og Sp, medan det andre er fremja av SV, Raudt og Frp, viser innstillinga.

Forslaget som har støtte frå Frp, lyder «Stortinget ber regjeringen etablere en egen erstatningsordning for de overlevende og etterlatte etter Alexander L. Kielland-ulykken».

I forslaget som er støtta av Sp, heiter det mellom anna at regjeringa blir beden om å etablere «en særskilt kompensasjonsordning for de overlevende og etterlatte etter Alexander L. Kielland-ulykken».

I dette forslaget blir Riksrevisjonen beden om å avklare ansvaret til styresmaktene for at ulykka kunne skje og dessutan manglande oppfølging av overlevande og etterlatne i løpet av året.

SV, Raudt og Frp håpar stadig

Arbeidarpartiet og Høgre gjekk i staden inn for å be Riksrevisjonen vurdere om noko har endra seg sidan den førre granskinga av ulykka.

Partia viser til at det i 1980-åra vart gjennomført eit erstatningsoppgjer til etterlatne og overlevande i regi av Phillips Petroleum og Stavanger Drilling.

Stortinget skal ifølgje NRK stemme over saka 5. juni. Frp, Raudt og SV håpar framleis på fleirtal for eit forslag om erstatning.

Arbeidspolitisk talsperson for Frp Dagfinn-Henrik Olsen seier det er «rett og slett skuffende at Høyre og Arbeiderpartiet ikke ønsker å komme de overlevende av Norges største industriulykke i møte».

– Håpet må vere at resten av Stortinget kan samlast om eit forslag som sikrar at dei overlevande får den rettmessige kompensasjonen sin, seier Olsen til NTB.

Han legg til at Frp vil ta kontakt med dei andre partia i håp om å få på plass eit fleirtal.

– Vi trur det skal vere mogleg å samle eit fleirtal i Stortinget, seier Raudt-representant Mimir Kristjansson til NRK.

– No må alle spørje partia sine om kva dei skal stemme og kvifor. Tida er inne for å gjere opp rekninga, seier Freddy André Øvstegård i SV til kanalen.

Offisiell unnskyldning

I 2021 beklaga regjeringa og Stortinget for mangelfull oppfølging av offer og etterlatne.

Frp, SV og Raudt skriv at Stortinget aldri har teke stilling til erstatningsspørsmålet etter ulykka, og desse partia meiner at offera i Kielland-ulykka er «verdige erstatning på lik linje med andre grupper som har ofret liv og helse på sokkelen, slik som nordsjødykkerne og oljepionerene».

123 menneske mista livet då bustadplattforma Alexander L. Kielland kantra 27. mars 1980 i det som er den største industriulykka i Noreg.