Stortingsfleirtal for ny barnehagelov – skal sikre like vilkår for pensjon

Arbeidarpartiet, Høgre, Senterpartiet, Venstre, KrF og Pasientfokus er samde om forslaget til nye reglar for styring og finansiering av barnehagesektoren.

Forslaget er ei oppfølging av barnehageforliket frå i fjor haust og har som mål å sikre føreseielegheit og gode forhold for både private og kommunale barnehagar.

– Alle parti har strekt seg for å få til dette, til det beste for ungane. For Arbeidarpartiet har det vore heilt avgjerande å få på plass likeverdige pensjonsvilkår for tilsette i private barnehagar og kunne stille krav til bruk av tilskota slik at pengane går til barna, seier Elise Waagen frå Arbeidarpartiet.

Lova blir behandla i Stortinget 3. juni.

– Fullt gjennomslag

– Vi har sikra valfridommen til foreldra, og vi har sikra dekning av pensjon. Vi har også sikra framleis likebehandling av private og offentlege barnehagar, seier Kari-Anne Jønnes frå Høgre til NTB.

Ho meiner at Høgre, Venstre og KrF har fått fullt gjennomslag i denne saka.

– Vi er opptekne av valfridom for foreldre, at kommunane ikkje skal avgjere kvar ungane skal gå eller når barnehagane skal vere opne, og å sikre at mat som eit viktig tilbod, seier Jønnes.

Særleg små, ideelle, enkeltståande barnehagar meiner Høgre-politikaren det var viktig å sikre i dette forliket.

– Dei har dei største utfordringane. Det er dei vi må redde no, fordi desse barnehagane har ikkje pengar til å dekkje kommande års pensjonsutgifter, seier ho.

– Viktig

Utdanningsforbundet hyllar avtalen og meiner han er svært viktig for å sikre gode pensjonsordningar for medlemmene sine.

– No er det ingen grunn til fleire utsetjingar i dei private barnehagane der pensjonsordningane framleis ikkje er på plass, seier Ann Mari Milo Lorentzen, nestleiar i forbundet

Leiar i Fagforbundet, Mette Nord, trur avtalen kan skape tryggleik for dei som jobbar i private barnehagar.

– Dette skaper tryggleik og føreseielegheit for medlemmene våre som jobbar i barnehagane. Fagforbundet er særleg fornøgd med semja om likeverdige pensjonsvilkår for tilsette i private og offentlege barnehagar, seier ho.

Raudt er ikkje særleg fornøgd med forliket.

– Barnehagekameratane har vorte samde om ei lov som framleis gjer det attraktiv og lønnsamt for Sveits’ rikaste nordmenn, Kjell Inge Røkke, å kjøpe seg opp i barnehageeigedom, seier stortingsrepresentant Hege Bae Nyholt i Raudt i ein kommentar til NTB.

– Raudt har heile tida kjempa for å tette hola som gjer det mogleg for folk å tene seg rike på skattepengane våre, men vart ikkje høyrd på dette., seier ho vidare.

Venstre: – Nederlag for Ap

Venstre meiner forliket er eit nederlag for Arbeidarpartiet fordi den lova regjeringa la fram i utgangspunktet, var heilt annleis.

– Tonje Brenna la fram noko som gjekk i strupen på dei private barnehagane. Det ville fråteke foreldra valfridom og vorte slutten på dei private barnehagane. No er det ingenting av det som står igjen, seier han til NTB og legg til:

– Dette burde vere ein lærepenge for regjeringa, at private barnehagar bidreg på vesentleg vis i samfunnet. Dette er eit solid nederlag for regjeringa.

Det er Waagen usamd i.

– Då vi i Ap og Sp tok initiativ til desse samtalane for eit år sidan, var det fordi vi såg at det var ein vanskeleg situasjon med høgt konfliktnivå og skyttargravsretorikk. Eg meiner vi no har klart å leggje dette bak oss for å fokusere på kva som er best for ungane, seier ho.

Bygd og barnehage

I tillegg er KrF, Senterpartiet og Pasientfokus med på forliket.

– Nærleik til barnehagar i heile landet er viktig, og blir sikra fleire stader med private barnehagar. Små, enkeltståande barnehagar tilfører ofte noko eige som til dømes natur- og gardsbarnehagar. Desse skal no få betre vilkår med ny finansiering og eit barnehageforlik 2.0, seier Marit Knutsdatter Strand (Sp).

Kjell Ingolf Ropstad frå KrF er glad for at forliket stoppar nedlegginga av private barnehagar.

Irene Ojala frå Pasientfokus trur forliket vil stå seg godt over tid.