Støre med straumløfte: – Vi skal gjere det vi kan

Han viser fram eit bilete av ein vedstabel utanfor hytta.

Medan straumdebatten har rasa i hovudstaden, har statsministeren nemleg feriert i fjellheimen. Undervegs har han også vore på den han kallar ei personleg åstadsynfaring ved vassmagasinet oppe ved Hallingskarvet.

Bileta på nettbrettet hans viser at vasstanden framleis er låg, men at vatnet no fossar inn frå snøsmeltinga.

– Det er ikkje mykje snø igjen, men det er ganske livleg i dei elvane.

Lovar å gjere det som trengst

NTB møter statsministeren på kontoret i Oslo, der han er innom på eit kort besøk før han skal vidare.

Gjennom sommaren har opposisjonen skulda regjeringa for å ta ei passiv «vente og sjå»-haldning til straumkrisa. Men no kjem Støre med eit løfte:

Han kan ikkje love regn. Men han skal gjere det han kan for å sikre kraftforsyninga.

– Eg er klar til å ta grep, seier han.

– Eg er statsminister i Noreg. Det er norske interesser eg er sett til å vareta. Det er å sikre forsyningstryggleiken for Noreg i ei europeisk energikrise. Andre europeiske land er i djup krise, verre enn her heime. Men vi skal sikre oss for ikkje å komme i forsyningsproblem. Og eg kjem til å bruke dei verkemidla som trengst for å nå det målet.

Støre fortel at regjeringa har jobba med saka gjennom heile sommaren. Han er i kontakt med olje- og energiminister Terje Lien Aasland (Ap) nesten dagleg.

Vassmagasina skal fyllast

Den eine bekymringa er fyllingsgrada i vassmagasina.

Den låg ved utgangen av førre veke på 65,1 prosent. Det er godt under normalen. I Sørvest-Noreg og i Aust-Noreg er fyllingsgrada på det lågaste nivået som er målt på denne tida av året dei siste 20 åra.

Situasjonen har fått Statnett til å oppjustere risikoen for rasjonering til vinteren frå grønt nivå til gult nivå.

Støre er ikkje nøgd.

– Vi skal fylle opp vassmagasina, seier han.

– For å bruke eit kjent omgrep som eg møtte oppe i Hallingdalen, då eg var der no: Det er vanleg å fylle opp stabburet før vinteren. Det må vi no gjere i vassmagasina våre. Signalet er tydeleg frå NVE, frå olje- og energiministeren og frå meg, og eg føreset at kraftselskapa merkar seg det. Eg føreset at kommunane som er eigarar av kraftselskap, også sender beskjedar. Dette er offentleg eigde selskap. Viss den bodskapen ikkje blir oppfatta, så må vi vurdere andre tiltak, i form av krav for å sikre ei forsvarleg magasinfylling.

Eksportrestriksjonar på bordet

Éi moglegheit er å innføre eit minstekrav til magasinfylling før vårløysinga. Statnett foreslo allereie i 2014 eit slikt minstekrav på 5 eller 10 prosent. Støre stadfestar at dette er ei moglegheit som regjeringa no ser på.

– Det er til svært grundig vurdering, og eg ser ikkje bort frå at det kan skje.

Eit anna grep kan vere å innføre eksportrestriksjonar. Støre understrekar at han i utgangspunktet er tilhengjar av kraftutveksling med andre land. Det har tent Noreg før og kjem til å tene Noreg også i framtida, meiner han.

– Men jobben min er å vareta det norske energisystemet. Og om nødvendig vil vi vurdere eksportrestriksjonar.

Kor alvorleg situasjonen må bli før regjeringa tek slike grep, vil ikkje Støre svare detaljert på.

Vurderer auka straumstøtte

Ei anna bekymring er straumstøtta. Den skal regjeringa no vurdere på nytt.

– Vi skal gå igjennom den straumstøtteordninga i haust. Det har vi vorte samde med SV om å gjere. Så får vi sjå kva konklusjonar vi trekkjer frå det, seier Støre.

Han står likevel fast på skepsisen sin til å innføre ein makspris på straum, som parti som Raudt og Frp har ivra for.

– Vi ser ikkje bort frå tiltak. Det har vi sagt heile vegen. Men det er også ganske tunge grunnar til ikkje å innføre ein makspris, åtvarar Støre.

Han legg til at han forstår kvifor makspris verkar forlokkande.

– Men vi skal vere veldig grundige på ikkje å ta forhasta konklusjonar. For vi kan risikere å gjere store feil.

(©NPK)