Støre legg fram historisk tryggingsstrategi: – Vi må vera førebudde

Torsdag legg han fram Noregs første nasjonale tryggingsstrategi. Bodskapen er klar: Verda har vorte farlegare og meir uføreseieleg.

– Kvar og ein av oss må forstå alvoret i situasjonen. Vi lever i den mest alvorlege tryggingspolitiske situasjonen sidan andre verdskrigen. Vi må vera førebudde på at Noreg kan rammast av meir alvorlege tryggingstruande hendingar enn vi har erfart så langt, seier Støre.

Strategien blir lagd fram med ei rekke krigar og konfliktar og økonomisk uro som bakteppe.

– Dette er ein strategi som på ein tydeleg måte definerer dei nasjonale tryggingsinteressene vi skal fremja og forsvara. Strategien gir oss eit klarare bilete av kva som er Noregs tryggingsinteresser, og seier noko om kva vi som samfunn må prioritera for å gjera Noreg tryggare, seier Støre.

Seks punkt

Vi må samla kreftene om det viktigaste for å halda Noreg trygt, er bodskapen frå regjeringa.

Seks grunnleggjande tryggingsinteresser blir peika ut i strategien:

• Eit fritt og sjølvstendig Noreg
• Eit sterkt demokrati
• Ein open og omstillingsdyktig økonomi
• Eit trygt og tillitsfullt samfunn
• Eit alliert fellesskap og samhald i Europa
• Ei verd som søkjer løysingar basert på folkeretten

I tillegg legg regjeringa fram tre strategiske hovudprioriteringar. Det er å raskt styrkja forsvarsevna, gjera samfunnet meir motstandsdyktig og å styrkja den økonomiske tryggleiken i landet.

Tryggleiks dugnad

Støre seier strategien dannar grunnlaget for dei politiske vala og prioriteringane for landet framover. Strategien skal leggja grunnlag for vidare arbeid i departementa.

– Heile samfunnet må bidra for å verna dei grunnleggjande tryggingsinteressene våre: Offentlege styresmakter, næringslivet, fagrørsla, det frivillige og kvar enkelt av oss. Strategien skal bidra til at vi alle dreg i same retning, seier statsministeren.

Forsvarskommisjonen, Totalberedskapskommisjonen og Nasjonalt tryggingsorgan (NSM) har peika på eit behov for ein slik strategi.

Styresmaktene, næringslivet og andre verksemder må kartleggja eigne verdiar og sårbarheiter og utarbeida planar for alvorlege hendingar, seier Støre.

– Saman skal vi gjera Noreg meir motstandsdyktig. Vi skal førebyggja, avdekkja og handtera truslar og stå betre rusta til å møta alvorlege hendingar.

(©NTB)