nyhende
Bømlafjordtunnelen:
Stengt tre gonger måndag
Ingen personar blei skadde, men Bømlafjordtunnelen var strengt i heile tre periodar måndag på grunn av ulike uhell i trafikken. Naudetatane, inkludert mannskap frå Førde brannstasjon, rykte ut til to av dei.
Første gongen skjedde det mellom klokka 11 og 11.30, då det blei meldt om røykutvikling i tunnelen. Årsaka viste seg å vera teknisk feil på ein personbil.
To bilar involvert
Klokka 16.43 fekk politiet melding om at ein personbil hadde køyrt inn i tunnelveggen etter først å ha vore borti ein møtande bil. I alt var det fire personar i bilane. Alle kom frå uhellet utan fysiske skader, opplyser vaktsjef Brit Jorunn Løvereide ved Haugesund politistasjon til Vestavind.
– Her var marginane på deira side. Denne ulukka hadde potensiale i seg for alvorleg personskade, supplerer utrykningsleiar Bjarne Hetleseter i Sveio brannvesen.
I samband med dette uhellet fekk ein av bilførarane, fødd i 1948, førarkortet sitt beslaglagt, fortel Løvereide.
Motorhavari
Tunnelen var stengt fram til klokka 17.30 i samband med denne hendinga. Berre få minuttar etter opninga, klokka 17.34, kom det ny melding til politiet, denne gongen om ein tankbil som hadde stoppa inne i tunnelen på grunn av motorhavari. Av same grunn hadde også hadde også ein personbil stoppa midt i vegbana. Begge trong hjelp til å koma seg ut. Bilbergarar var på plass klokka 18.11, ifølge politiet sin logg. Ved 20-tida var vegen rydda og tunnelen open igjen.
