Står inne for at skulane er viktige for bygdene

Dei seks politikarane Vestavind møter denne våte vårdagen, meiner at det vil gjera stor skade om to bygder mister skulane sine. Mogleg reduserte driftsutgifter ser dei på som mikroskopiske i den store samanhengen.

Bygdene treng innbyggjarar, og sjølv om elevtalsframskrivinga tilseier ein liten nedgang dei neste åra, har dei stor tru på at dette vil retta seg opp på lengre sikt, viss ein mobiliserer no.

– Når ein skal byggja ut nye bustadfelt i Sveio kommune, er det i samfunnsplanen krav om nærleik til skule. Derfor er det utruleg viktig å behalda skulane, seier Lars Einar Hollund frå Sveio Høgre.

Politikarane meiner det er lurt å tenka utanfor boksen, og sjå moglegheiter framfor avgrensingar. Eit oppvekstsenter i Valestrand med element frå Fartein Valen blir nemnt, for blandar ein inn kultur, kan ein byggja med midlar frå andre hald enn å gjera heile investeringa sjølv.

God økonomi

– Skulane er viktige for både bygd og nærmiljø, påpeiker Monica V. Valen, som hadde hyppige innlegg i formannskapet, der ho kom med sine argument for å behalda skulane – som at Førde skule ikkje er rusta for å ta i mot elevtalet frå både Auklandshamn og Valestrand.

– Det er snakk om gode skular som leverer godt på både økonomi og læring. Det er ganske enkelt ikkje grunnlag for å leggja ned. Ei nedlegging vil i sum vera negativ både for elevane, bygdene og heile kommunen meiner John Kristian Økland (H).

– Sveio kommune har god økonomi, det er rundt 90 millionar på bok som politikarane kan bruka på kva dei vil – i morgon. Det gjeld ikkje berre om å heia på bygdene, men å faktisk gjera noko. Me er nøydde for å investera i både Førde, Ekrene og Vikse også, seier Hollund.

Ole-Ørjan Hov i Sveio MDG meiner det er verdt å bruka litt ekstra på dei to skulane.

– Det blir påstått at bygdene vil overleva, men me må òg bidra med utvikling. Det vil bli vanskeleg utan skular, seier Hov.

Grundig og veldiskutert

Sveio SV har drøfta saka godt. Samla sett kjenner medlemmene deira til utfordringar ved alle skulane i Sveio.

– Me har gjort ei grundig vurdering. Me ser ingen gode nok grunnar til å leggja ned. Innsparingane og folketalsutviklinga det er vist til er for usikre, oppsummerer Olav Østebø Olsen, nestleiar i lokallaget. Sveio SV meiner også at politikarane laga seg eit solid grunnlag som forplikta seg til å satsa i distrikta, då Sveio kommune for ei tid tilbake takka nei til samanslåing med Haugesund kommune.

Jarle Jacobsen i Sveio KrF seier at fleire innbyggjarar har vore «i dei» for å få vita kva dei vil stemma. Sjølv om han er klar på at ståstaden til både han og KrF er at dei ønskjer å behalda skulestrukturen som i dag, vil ikkje den drivne politikaren forhasta seg. Jobben er enda ikkje ferdig.

– Me følgjer den politiske prosessen. Saka er veldiskutert i partigruppa, og me jobbar politisk fram til gruppemøtet, seier Jacobsen.

Gruppemøte blir det for alle partia onsdagen før kommunestyremøtet.

Skrik om hjelp

Eit anna tema i denne debatten er det som går føre seg på Facebook. Det kan gå heitt føre seg. Enkelte innbyggjarar går over streken, men diskusjon må ein tåla, så lenge det er sak og ikkje person som blir diskutert.

– Eg meiner det er skrik om hjelp. Folk får ytra sine meiningar her, når ein ikkje kan gjera det i bygdemøte, seier Valen.

– Eg trur det er tempoet som har skremt folk, seier Jacobsen, som meiner det er legitimt å ha andre meiningar.

13-12

Dei fem partia som er for å behalda skulane, har samla 12 representantar i kommunestyret. Det vil seia at dei manglar éi stemme for å ha fleirtal. Fleire representantar i dei to andre partia har flagga kva dei meiner, dei to uavhengige like så. Mange avstemmingar har i denne perioden enda 13-12 i favør Arbeiderpartiet og Framstegspartiet sin politikk.

Hov (MDG) skildrar framferda frå politikarar i posisjonen, som ikkje verkar å vera lydhøyre eller søkjer samarbeid med andre parti, som både irriterande og sår – spesielt etter det som skjedde etter valet, då Ap og FrP havna i posisjon likevel.

– Ein kan bli fortvila. Det er ikkje eit fungerande klima for å finna naturlege kompromiss. Det blir berre sagt nei, opplever Økland. Partikollega Hollund seier seg samd.

– Dei seier at me må koma med våre forslag i god tid, medan dei seier sine i møte, for dei har alt fleirtal. Men me har ikkje gitt opp fleirtalet i denne saka, forsikrar Hollund.

Håpet til opposisjonen er at Ap og FrP ikkje bind gruppene sine mot eit felles vedtak, men at representantane kan få stemma ut frå eiga overbevisning i saka.