nyhende
Språket vert styggare i norske skular
Ein rapport frå Redd Barna viser at språket vert styggare og tøffare i norske skular.
NPK: Språkbruken i norske skular har vorte tøffare, noko som vert stadfesta i den ferske rapporten «Gi oss Spilleregler!» frå Redd Barna.
Redd Barna gjennomførte sjølve undersøkinga blant 3.-, 5.- og 7.-klassingar før pandemien slo inn, mellom anna for å høyre korleis elevane sjølv opplever at språkbruk påverkar klassemiljøet og kvardagen i skulegarden.
Rapporten konkluderer mellom anna med at elevar frå femteklasse og oppover har vorte grovare i målet enn før.
Leiar i arbeidet med undersøkinga, Anne Elin Kleva, seier mykje av språkbruken handlar om seksuell trakassering.
– «Homse», «lesbisk»og «gay». Det er mykje som handlar om kjønnsidentitet og seksuell orientering. Dei bruker òg ord som «kuk», «din jævla bitch» eller «hore». I tillegg er det mykje rasisme, seier Kleva.
(©NPK)
