Bli abonnent
Logg inn

nyhende

Olav Flatnes Skarvelland (t.v.), Kristine Kaldheim Mundal og Mads Haugan Våga gjorde mange glade i Sveio med MOT til å gleda-dagen.
Olav Flatnes Skarvelland (t.v.), Kristine Kaldheim Mundal og Mads Haugan Våga gjorde mange glade i Sveio med MOT til å gleda-dagen.

Sju arbeidsplassar blei ekstra glade i dag

I dag har utvalde arbeidsplassar i Sveio fått besøk av MOT-elevar frå Sveio ungdomsskule. Med seg hadde dei store korger med både etande og drikkande godsaker.

Publisert Sist oppdatert

Kort om MOT

  • MOT er en norsk ideell organisasjon stifta i 1994. Initiativtakarane var skøyteløparane Atle Vårvik og Johann Olav Koss.
  • Verdiane er MOT til å leva,  MOT til å bry seg og MOT til å seia nei.
  • MOT styrkar ungdom sin livskvalitet, mentale helse, bevisstheit og mot og gjer ungdommane meir robuste. MOT fremmar trygge klassemiljø der alle blir inkludert.
  • MOT forebygger ekskludering, mobbing, vald, rusmisbruk, kriminalitet og psykiske vanskar.
  • Dette blir gjort gjennom MOT-konseptet med enkle livsverdiar og skreddersydde MOT-program som blir brukt av skular og kommunar.

Kjelde: MOT

MOT til å gleda-dagen er eigentleg i morgon, torsdag. Men sidan 10. klassingane har tentamen då, spreidde dei glede dagen før dagen.

– Me synest Vestavind gjer ein så viktig jobb for mange at de fortener litt ekstra glede i dag, sa tre lett forblåste og litt våte besøkande på veg inn døra.

Til saman var 10 MOT-elevar på farten i kommunen i dag. Olav Flatnes Skarveland (15) og Mads Haugan Våga (15) har med seg MOT-coach Kristine Kaldheim Mundal (23) på sine besøk.

Spreidde glede i heile kommunen

– MOT til å gleda-dagen feirar me i heile kommunen, og til utvalde plassar har me med oss ei korg med mykje forskjellig som er sponsa av Kiwi, fortel Olav.

MOT til å gleda-dagen er sjølvsagt for å gleda andre, men også for å visa at ein set pris på det andre gjer og understreka at alle har ein verdi og gjer ein jobb for kvarandre.

Forutan Vestavind, delte MOT-elevane ut korger med mye å gleda seg over til kommunehuset, Sveio omsorgsenter, som fekk to, Psykisk helse, Aktivitetshuset, lærarane på Sveio skule og Torsdagskveldsen til Sveio IL.

Besøkte 7. klassane

Gruppene med MOT-elevar har også hatt eit anna oppdrag i dag. Dei besøkte alle 7. klassane i kommunen.

– Kanskje det viktigste me har gjort i dag, er å snakka med 7. klassingane som skal begynna på ungdomsskulen til neste år. Me fortel om korleis det er på ungdomsskulen og kva som kan gjera at overgangen blir lettare. Og me svarar på spørsmål, fortel Mads.

– Fekk de mange spørsmål?

– Nei, dei var eigentleg veldig stille. Men me kjem på nytt besøk til våren. Før det kan 7. klassingane skriva spørsmål på ein lapp og legga i ein postkasse. Då brukar det å vera ein del spørsmål. Det er kanskje lettare å spørja på den måten enn framfor heile klassen, seier Mads.

Positive tiltak heile året

MOT til å gleda-dagen er berre litt av arbeidet MOT gjer i Sveio. Ein annan del er å vera synlege MOT-elevar på skulen, og Olav og Mads fortel at dei jobbar med positive tiltak heile året.

– Eit av dei er at me låner ut spel i langfriminuttet måndagar og fredagar. Det er folk som låner spel kvar gong, og det er kjekt å sjå at elevane sit i kantina og spelar. I tillegg spelar me musikk ein time, fortel Mads.

Så er det ut i haustvêret igjen for å spreia meir glede.
nyhende
Powered by Labrador CMS