Sesongopning på Ryvarden

Kunstnaren Bente Sandtorv er første utstillar i galleriet dette året. Utstillinga hennar blir å sjå på Ryvarden fram til og med 28. april, melder den nye kulturfyrvaktaren, Ruth G. Ø. Eriksen, i ei pressemelding.

Galleriet på Ryvarden vil ha opningstider alle søndagar og andre heilagdagar i sesongen.

Bente Sandtorv er fødd og oppvaksen i Bergen. Ho lagar illustrasjonar og akrylmaleri. Teikningane hennar er ofte enkle og prega av den nordiske kvardagen. Maleria er meir fargerike, fortel pressemeldinga.

Det blir også fortalt at det er viktig for kunstnaren å få fram stemningar, kjensler og ettertanke. Kvart bilde har difor si eiga historie, og det er samanheng mellom tittel og bilde. Inspirasjonskjelda er menneske. For kunstnaren er det viktig å få fram kor ulike alle menneske er.