nyhende
Ser på hat og truslar mot politikarar som ei alvorleg samfunnsutfordring
Politimeister i Sør-Vest politidistrikt Hans Vik, oppmodar til førebygging av hatefulle ytringar og truslar retta mot politikarar og andre samfunnsdebattantar.
Politimeisteren skildrar hat og truslar mot politikarar som ei alvorleg samfunnsutfordring.
– Det er alvorleg for dei som blir ramma, samt for deira næraste og for demokratiet. Hatytringar og truslar bidrar òg til å spreia utrygghet mellom anna som deltar i det offentlege ordskiftet, skriv Vik i eit brev, som er sendt ut til kommunane i politidistriktet.
Trussel mot ytringsfridomen
Vidare skriv han at mange som engasjerer seg i politikken opplever at debattklimaet er i ferd med å bli hardare. Dette kan utgjera ein trussel mot ytringsfridommen og demokratiet. Det kan føra til at fleire vegrar seg frå å delta i den offentlege debatten, eller ta del i (lokal) politikken.
At det kan vera tøft å vera politikar har kome fram også i Sveio, spesielt dei siste vekene og månadane, i ly av skulesaka. Nokon seier at ein må tåla slikt, men kor går eigentleg grensa?
Må vurderast
– Om dei ulike kommentarane på nettet er definert som hatefulle ytringar eller truslar, vil ei eventuell etterforsking og påtalemessig vurdering i etterkant avgjera, seier politikontakt for Sveio, Bjørn Inge Espeland.
Temaet blir tatt opp i politiråd, der ordførar og rådmann er oppmoda til å ha dette på agendaen i ulike kommunale fora.
