nyhende
Rutinekontroll i Sveio
Berre nokre få bilførarar fekk mangellapp for tekniske feil, då Statens vegvesen utførte rutinekontroll i Sveio sentrum, torsdag føremiddag.
– Me har avdekka ein del tekniske manglar, som feil på lys, men ikkje meir enn normalt, opplyser Roy Terje Moen, seniorinspektør i Statens vegvesen.
Saman med Sigbjørn Eltervåg var han torsdag ute på ein trafikkontroll i Sveio, med hovudfokus på belte- og lett teknisk kontroll.
Flytta seg til sentrum
Når Vestavind tek kontakt har dei teke oppstilling i Sveiogata, vis-a-vis Sveio kyrkje.
– Me stod først nede ved kyrkjegarden, no har me forflytta oss opp til sentrum der siktsona er lengre og dermed lettare å bruka kikkerten. Førebels ser det svært bra ut, me har ikkje oppdaga store manglar, og alle har fått lov å køyra vidare, fortel Roy Terje Moen, halvannan time ute i kontrollen.
Rettleiing
Imens brukar kollega Eltervåg kikkerten flittig. Med sitt årvakne blikk ser han om folk har bilbeltet på, eller om dei kjapt prøver å få det på når dei ser det er kontroll.
– Gebyret for å unnlata å bruka belte er 1.500 kroner, men det er ikkje det viktigaste, for oss betyr det meir å endra haldningar og rettleia folk, presiserer Eltervåg.
