nyhende
Rekordmange søkjer om sal av mjølkekvotar
Rekordmange søkjer om sal av mjølkekvotar, ifølgje Landbruksdirektoratet. I år har det komme inn mellom tre til fire gonger så mange søknader som i fjor.
Heile 1.049 eigarar av kumjølkkvote og 33 eigarar av geitemjølkkvote har søkt om sal av grunnkvote i år, viser ei førebels oppteljing Landbruksdirektoratet har gjort.
– Vi var førebudde på at det kom til å komme mange søknader i år. Både endringar i skattereglar, og moglegheita til å selje 100 prosent privat i år, har sannsynlegvis vore viktige drivarar til det høge søkjartalet, seier seksjonssjef Maiken Wickstrøm i Landbruksdirektoratet i ei pressemelding.
For andre året på rad kan landbrukseigarar med grunnkvote selje heile kvoten privat. I 2022, som var eit normalår, måtte minst 40 prosent av kvoten seljast til staten.
Trøndelag toppar lista med 242 søknader, medan Rogaland er nummer to med 182 søknader. Andre regionar med høge tal på søknader inkluderer tidlegare Oppland fylke med 145 og Vestland med 113.
