Regjeringa vil sikre TV-sjåarar gratis tilgang til sportsmeisterskap

NPK-NTB: Det blir utfallet dersom regjeringa får det som ho vil. Fredag opplyser Kulturdepartementet at det vil utvide lista over idrettsarrangement som blir rekna for å ha vesentleg samfunnsmessig betydning.

Formålet med lista er å sikre at folk flest kan sjå dei viktigaste sportsevenementa utan å betale ekstra. Frå før står olympiske leikar, og dessutan kampane til herrelandslaget i fotball og kvinnelandslaget i handball der.

– Vi vil at flest mogleg skal få vere med å heie fram heltane våre på landslaga i handball og fotball. Ei utviding av denne lista gjer at endå fleire no vil få moglegheit til å følgje med når vi kjempar om medaljar, seier kultur- og likestillingsminister Anette Trettebergstuen i ei fråsegn.

Forslaget med den oppdaterte lista vart fredag send på høyring. Endringa må godkjennast av Eftas overvakingsorgan Esa.

Den omtalte lista er heimla i Kringkastingsloven. Der heiter det:

«Ein kringkastar som har tileigna einerett til fjernsynssending av hendingar av vesentleg samfunnsmessig tydning må ikkje utnytte eineretten på ein slik måte at ein tydeleg del av sjåarane blir fråteke moglegheita til å følgje hendinga på vederlagsfritt fjernsyn.»

• OL, sommar- og vinterleikane i sin heilskap

• VM i fotball for menn i sin heilskap, under dette kvalifiseringskampar med norsk deltaking

• EM i fotball for menn i sin heilskap, under dette kvalifiseringskampar med norsk deltaking

• VM i handball for kvinner i sin heilskap

• EM i handball for kvinner i sin heilskap

• Cupfinalen i fotball for menn

• VM på ski i nordiske greiner i sin heilskap

• VM i alpint i sin heilskap

• Holmenkollen FIS World Cup Nordic

• VM i skiskyting

(©NPK)