nyhende
Regjeringa lovar meir i straumstøtte til folk flest
Regjeringa vil auke og styrkje straumstøtta. Olje- og energiminister Terje Aasland (Ap) tek ei hasteinnkalling av Stortinget på straumkrisa med stor ro.
NPK-NTB: – Vi har jobba intenst i ein lang periode. Folk skal vite at vi handterer dette. Dei skal vere trygge på at dei har straum, og at dei har råd til å betale rekningane, seier Aasland til NTB.
Når tiltaka vil komme, er likevel ikkje klart enno. Men statsminister Jonas Gahr Støre seier til TV 2 at regjeringa allereie i august kan leggje ei sak fram for Stortinget.
Tre spor
Ifølgje Aasland jobbar regjeringa langs tre spor:
* Halde oppe nasjonal forsyningstryggleik
* Forbetra støtteordningar til hushalda
* Støtte til næringslivet
Når det gjeld forsyningstryggleiken, vurderer regjeringa mellom anna ein regel om at når vasstanden i magasina fell ned mot svært låge nivå, skal fyllinga prioriterast og straumeksporten blir avgrensa.
Kva som er låge nivå, varierer med årstidene. Den er også ulik for dei rundt 1.800 vasskraftmagasina i Noreg.
– Vi lagar no ei konkret innramming for korleis dette skal skje. Vi må sikre at vi ikkje kvart år kjem i ein svært anstrengd kraftsituasjon, påpeikar Aasland.
Som kjent har fyllingsgrada mange stader vore på eit historisk minimum den siste tida.
Lover meir i støtte
Regjeringa har fått ramsalt kritikk for å vere trege på banen med tiltak etter rekordhøge straumprisar i sommar, og onsdag vart det klart at det er fleirtal på Stortinget for å hasteinnkalle representantane i ferien i saka. Saka skal avgjerast av Stortingets presidentskap måndag.
Aasland fryktar ikkje at Stortinget eventuelt vil gjere vedtak som kan stikke kjeppar i hjula for opplegget til regjeringa.
– Førebels ligg det ikkje nokon konkret sak på bordet, påpeikar han.
– Høgre vil at straumstøtta skal aukast til 90 prosent frå 1. september, kan det vere aktuelt?
– Vi har heile tida vore opptekne av å gjere forbetringar for hushalda. Vi opnar for å forsterke ordninga og ser no på korleis vi kan treffe dei med dårlegast råd endå betre, seier Aasland.
Straumstøtteordninga vil vare så lenge prisane er unormalt høge, lovar han.
Det same gjer finansminister Trygve Slagsvold Vedum. Til Dagbladet seier han at folk vil få dekt meir av straumrekninga framover.
– Vi jobbar med grep for å auke og styrkje straumstøtta. Ordninga skal betrast ytterlegare samanlikna med i dag og gi større lettar til kvar enkelt straumkunde, seier han.
SSB er no i ferd med å evaluere dagens straumstøtteordning. Rapporten er venta i september.
Støtte til næringslivet
Både opposisjonen og NHO har kravd at regjeringa no må sikre støtte til bedrifter som slit. Dette blir det no jobba intenst med, forsikrar Aasland.
– Men tiltaka må vere målretta og bidra til å sikre arbeidsplassar. Vi må sikre at dei ikkje endar opp som reine kontantoverføringar til bedriftseigarane, seier han.
Arbeidet er krevjande, for det handlar om store pengar.
– Dette må handterast med varsemd. Vi må unngå tiltak som aukar presset i norsk økonomi eller forsterkar straumkrisa, seier Aasland.
Nord og sør
Også dei enorme prisvariasjonane mellom sør og nord har fått mykje merksemd. Aasland meiner at ein ikkje løyser problemet ved å la det flyte meir straum frå nord til sør.
– I staden må vi førebu utvikling av meir fornybar kraft i dei områda som treng meir, seier han og peikar på havvindsatsinga og gjenopptakinga av konsesjonsbehandling av vindkraft på land.
Kraftprodusentane har også vorte oppmuntra til å oppgradere og modernisere eksisterande vasskraftverk.
– Vi må sørgje for at vi utnyttar kraftressursane på ein best mogleg måte, seier Aasland.
(©NPK)
