nyhende
Raja til kamp for lærarane: – Lønna må opp!
Måndag blir lærarstreiken trappa opp. Venstre-nestleiar Abid Raja seier at han ikkje vil blande seg inn i konflikten, men er tydeleg på at lønna må aukast.
Han møtte denne veka leiar i Utdanningsforbundet Steffen Handal på gata i Arendal. Forbundet er for tida i streik og konflikt med organisasjonen til kommunesektoren KS om lønnsvilkåra. Måndag går 1.300 lærarar til ut i streik.
No stiller Raja seg side om side med forbundet for å be om betre vilkår for lærarane.
– KS, kommunane og politikarar må skjønne kvifor læraryrket er viktig. Det er det aller viktigaste yrket i Noreg, fordi dei jobbar med våre eigne barn og Noregs framtid, seier Raja, som er utdanningspolitisk talsperson i partiet.
Lærarlønningane blir bestemde gjennom forhandlingar mellom KS og fagforeiningane, og KS har vore tydelege på at har strekt seg så langt som kommuneøkonomien tillèt for å gi lærarane lønnsløft.
– Vi politikarar kan ikkje gå inn i ein pågåande konflikt. Men vi kan oppmode partane til å snakke saman, seier Raja.
Det høyrer med til historia at Venstre styrte Kunnskapsdepartementet frå januar 2020 og fram til valet i fjor haust.
I forkant av landsmøtet i oktober har eit utval i partiet gått inn for å auke lønna til lærarane, noko Raja stiller seg bak.
Handal i Utdanningsforbundet takkar for støtta frå Venstre-politikaren.
– Det å ha respekt for partane i eit tariffoppgjer, det er bra. Men det er også bra med politikarar som bryr seg om at elevane har kvalifiserte lærarar. Det treng vi fleire politikarar som gjer, seier han.
Og legg til:
– Eg er veldig glad for at politikarar bryr seg. Det må vere frustrerande å sitje på Stortinget å ha ein arbeidsgivar der ute som tek ansvar for lærarane på den måten dei gjer no. Vi har vorte gjort til lønnstaparar seks år på rad. Det er ikkje noko viktig bidrag for å nå dei måla Abid Raja har om at alle elevar skal ha ein kvalifisert lærar.
KS-styreleiar Gunn Marit Helgesen har følgjande kommentar til saka:
– Eg er heilt samd med Abid Raja i at læraryrket er veldig viktig. Derfor samarbeider vi med staten og lærarorganisasjonane om å styrkje rekrutteringa til utdanninga og yrket. Lønnsoppgjeret er eitt bidrag. Alle unge nyutdanna får eit kraftig lønnsløft, også lærarar.
(©NPK)
