nyhende
Politikarar i sandkassa
Fredag besøkte 1. og 2. kandidat for KrF Hordland, Dag Inge Ulstein og Astrid Aarhus Byrknes, Bua kultur- og friluftsbarnehage.
Den politiske praten føregjekk midt i den store sandkassa, der smårollingane Anna og Petter tydeleg sette pris på sine nye leikekameratar. Og medan trillebår og lastebilen blei fylt med sand, gjekk praten livleg.
Med i gjengen var også vår lokale KrF-politikar og fylkestyremedlem, Jarle Jacobsen. Mens samferdselsminister Knut Arild Hareide kom litt for seint, og måtte nøya seg meg ei kjapp omvisning på huset.
Det var Marianne Folgerø, pedagogisk leiar og barnehageeigar (saman med Silje Huse), som tok imot besøket. Barnehagen har for tida 25 barn.
– Eg tenkte først å seia nei fordi me har så travle arbeidsdagar, men ombestemte meg, – tenkte det ville vera lurt å få koma tettare på og få snakka med dei som kan vera «vår» stemme inn mot regjeringa, opplyser Folgerø.
Storberget-rapporten
Folgerø er oppteken av valkampen, og ville vita kva KrF tenkjer vidare når det gjeld satsinga på ny finansieringsmodell når det gjeld barnehagar, den såkalla Storberget-rapporten som no er ute høyring.
– Eg er nøgd med det KrF har gjort til no – me har fått to år med ekstra tilskot for å oppfylla bemanningsnormen, og det hjelpte veldig på drifta. Men me ønskjer jo fortsatt å driva, så viss den modellen som er føreslått no går gjennom, vil me som driv private barnehagar oppleva det som litt urettferdig. Etter mi meining burde vore eit skilje mellom dei store kjedane og frittståande barnehagar, meiner Folgerø.
Fødselspermisjon og valfridom for foreldre, – det at ein sjølv skal få bestemma kva som er best, er også noko som opptek barnehageeigaren.
– Familiar må sjølve få lov å bestemma korleis dei vil gjera dette, meiner ho.
– Dette vil me ta med oss vidare
Begge utspela blei godt mottekne av politikarane.
– Dette er noko me vil ta med oss vidare, forsikra Dag Inge Ulstein. Han kunne elles meddela at KrF har fått nye veljarar berre på grunn av sin ståstad når det gjeld fødselspermisjon og valfridom.
– Viss me får det som me ønskjer skal me også få til betre overgang mellom barnehage og skule. I dag er det svært stor forskjell i dei enkelte kommunane, opplyser Ulstein.
Etter barnehagebesøket drog følgjet til Bømlo og Hareide-familien, deretter gjekk turen til Sæbø gard på Stord, førehandsstemming på kulturhuset, før dagen blei avslutta med safett på Fitjar.
