nyhende
Petter Steen jr. blir ny styreleiar i Helse Fonna
Petter Steen jr. tek over som styreleiar i Helse Fonna etter sveibuen Per Bjørn Habbestad (64).
Det er oppnemnd nye styre i helseføretaka på Vestlandet i føretaksmøte 23. februar 2022.
I Helse Fonna tek 59-åringen Petter Steen jr. over etter at sveibuen Per Bjørn Habbestad (64) har hatt vervet i to år.
Petter Steen jr. er busett i Haugesun, men jobbar til daglig som rådgjevar i Sveio kommune.
Ser fram til samarbeidet
Agnes Landstad, styreleiar i Helse Vest RHF, ser fram til samarbeidet med styra i heseføretaka.
— Vi har klare styringsmål for sjukehusa på Vestlandet og kompetansen i styra skal nyttast til god styring og utvikling, for å sørge for at tenestene våre er berekraftige og framtidsretta, seier Landstad.
Legitimitet i befolkninga
Styret i Helse Vest RHF har lagt vekt på ulike føringar og moment i valet av styremedlemmer i helseføretaka. Mellom anna slår Helseføretakslova fast at det skal leggjast vekt på legitimitet i befolkninga. Styret skal til saman inneha den naudsynte kompetansen til å ivareta oppdraget og ansvaret styret er pålagt gjennom lovgiving og av eigar.
Styra i Helse Stavanger HF, Helse Førde HF, Helse Bergen HF og Helse Fonna HF har 11 medlemmer kvar der sju er eigaroppnemnde medan fire er valde av og blant dei tilsette.
Dette er dei eigaroppnemnde styremedlemmene i styret i Helse Fonna HF frå 23. februar:
Petter Steen jr. (styreleiar), Brian Bjordal (nestleiar), Ingvill Skogseth, Anne Sissel Faugstad, Kjersti Follesø, Helga Arianson og Per Karlsen.
