På tide å byta ut røykvarslarane dine?

1. desember var det Røykvarslardagen. I tillegg til å sjekka batteria kan det også vera lurt å sjekka sjekka elektronikken i røykvarslaren.

– Røykvarslarar bør normalt bytast ut etter at du har brukt dei i 8-10 år. Du bør derfor sjekka kor gamle røykvarslarane dine er og vurdera om det er på tide å byta dei ut. Produksjonsdatoen finn du på baksida av røykvarslaren, seier branninspektør Sigbjørn Toskedal, Haugaland brann og redning iks.

Når du har byta ut røykvarslar eller skifta batteri, må du testa testknappen til røykvarslaren, slik at du veit at den verkar.

EE-avfall

I følgje ei undersøking frå Prognosesenteret finst det i gjennomsnitt 3,5 røykvarslarar per bustad og 2,5 røykvarslarar per fritidsbustad. Til saman er det cirka 10 millionar røykvarslarar i norske heimar.

Røykvarslarar er EE-avfall som ikkje skal kastast i søpla. Gamle røykvarslarar kan leverast gratis til forhandlarar og til din lokale gjenvinningsstasjon.

Minst éin varslar i kvar etasje

Alle bustader skal ha røykvarslarar eller brannalarmanlegg og du må ha minst éin varslar i kvar etasje. Alarmen skal kunna høyrast tydeleg på opphaldsrom og soverom, òg når døra mellom romma er lukka. Røykvarslarar bør testast jamleg og kvar gang du har vore bortreist over lengre tid. Det er òg ein fordel å støvsuga han jamleg. Det aukar levetida til varslaren.

– Du bør kopla røykvarslarane saman, slik at alle varslarane pip samstundes ved brann. Dette kan gi deg verdifull tid til å evakuera, til dømes viss ein brann startar i kjellaren og du søv i andre etasje. Det kan vera med på å redda liv, seier Toskedal.