nyhende
Overraskande funn av TBE-virus hos hestar i Vestland
Ein ny studie avdekkjer overraskande høg førekomst av flåttsmitte blant hestar i Sør-Noreg.
Undersøkinga, leia av doktorgradsstipendiat Hanne Kloster ved Universitetet i Agder, viser at 66 prosent av dei 331 undersøkte hestane hadde antistoff mot ein eller fleire flåttsjukdommar , skriv NRK.
– Det er nok mange fleire hestar som har vore utsette for flått enn det hesteeigarar er klar over, seier Kloster til NRK.
Studien, som omfatta hestar i Agder, Telemark, Vestfold, Vestland og Viken, viste høge førekomstar i alle fylka. Agder hadde dei høgaste funna. Det blei funne antistoff mot TBE-virus i 10 prosent av blodprøvene frå Vestland, trass i at det ikkje er meldt om sjukdomstilfelle hos menneske i fylket.
– Funna våre kan tyde på at det er ein del smitte der sjølv om vi ikkje har fått påvist smitte hos menneske enno, seier Kloster.
