nyhende
Oppmodar til deltaking i ryddeaksjon
Ordførar André Mundal Haukås og kommunekoordinator Gjertrud Svartveit Osmundsen oppmodar folk i Sveio til å bli med på ryddeaksjonen Rein Hardangerfjord.
– Ta kontakt med meg om de treng hanskar, bossekker eller «big bags» til å samla skrotet i, seier Osmundsen og viser fram materiellet ho har fått frå aksjonsleiinga frå aksjonsleiinga til gratis utdeling.
Konteiner i Førde
Sjølve aksjonsdagen er torsdag 19. september, men i samband med aksjonen blir det plassert konteinerar i kvar kommune som blir ståande frå måndag 16. til måndag 23. september.
I Sveio blir konteineren å finna på parkeringsplassen like overfor den gamle kyrkjegarden i Førde sentrum. Både enkeltpersonar og lag og organisasjonar kan delta ved å registrera seg på Rein Hardangerfjord si nettside. Og dei kan rydda og kasta boss i konteineren så lenge den blir ståande.
Rein Hardangerfjord-aksjonen fell saman med den nasjonale strandryddeveka frå 13. til 23. september. Stiftelsen Framtidshavet står bak Rein Hardangerfjord. Aksjonen blir gjennomført i kommunane Austevoll, Bømlo, Eidfjord, Etne, Fitjar, Kvam, Kvinnherad, Stord og Sveio. Hovudsete for aksjonen flyttar frå kommune til kommune. I år held leiinga til på Leirvik, der det blir samling for alle frivillige om bord i veteranskipet «Sunnhordland» onsdag 18. september.
Opptekne av plast
Sjølv om Rein Hardangerfjord i utgangspunktet er ein strandryddeaksjon, understsrekar både Haukås og Osmundsen at aksjonen også kan omfatta rydding i bustadområde og der folk elles ferdast.
– Boss som ikkje blir rydda og fjerna, vil før eller seinare hamna i sjøen, seier dei.
Særleg er dei opptekne av å få samla inn plastavfall.
– Dei første aksjonsåra kom det inn mykje plast. Seinare har det blitt mindre, og det tyder vel at aksjonen har hatt effekt, seier Haukås.
Vil ha fleire med
Tidlegare år har ikkje Rein Hardangerfjord fått så stor oppslutnad i Sveio. Osmundsen har ikkje tilgang til opplysningar om kor mange som har meldt seg på i år, men håpar at fleire vil la seg engasjera.
– Kanskje ikkje alle tenkjer over det, men Bømlafjorden er ein del av Hardangerfjord-systemet. Og kommunen har ei svært lang strandline å ta vare på, seier ho.
