nyhende
Opning av tinghuset og julegrantenning samla Førde
Fredag ettermiddag var det offisiell opning av tinghuset i Førde. Og i den store stova i huset var borda dekka, julepynten på plass, og dei frivillige bød på gratis pølser til alle som tok turen innom.
Det gamle huset, som har stått støtt i over 130 år, har vore gjennom oppgraderingar. Renoveringsarbeidet er framleis ikkje heilt ferdig, men Førde bygdalag valde likevel å invitere til opning i førjulstida. Praten gjekk livleg mellom dei frammøtte, og mange tok seg god tid til både mat, saft og litt latter mellom bordene.
Pølser, prat og dugnadsånd
Ved den provisoriske kjøkkenbenken sto to av kvinnene som har vore med i dugnadsarbeidet i huset, Ingunn Westergaard Hidle og Berit Bråtveit. I kveld var dei på plass med store kjelar og pølseklyper. Denne dagen hadde dei fått i oppdrag å dele ut 150 pølser, noko som såg ut til å falle i smak hos både små og store.
Enhetsleiar for samfunnsutvikling i Sveio, Bente Marie Johansen, heldt tale under markeringa. Ho rosa den sterke dugnadsånda i bygda og peikte på kor viktig slike møteplassar er for lokalsamfunnet. Samstundes oppmoda ho folk i Førde til å ta det nyoppussa tinghuset aktivt i bruk framover.
Blant dei yngste deltakarane var Håkon Nygaard, som hadde funne seg vel til rette på fanget til mormor Britt Helen Kallevik Grutle, med ei pølse i handa. Håkon kunne fortelje at han sjølv hadde vore med pappa og fått juletreet inn i huset før opninga.
Lys i treet og liv på plassen
Etter samlinga i tinghuset gjekk turen vidare til julegrantenning nokre titals meter lenger oppe, utanfor Joker-butikken. Der vart det spelt musikk og halde fleire små talar, medan folk prata saman og venta på at lysa i treet skulle tennast. Då lysa kom på, kasta grantreet eit varmt skjær over den oppmøtte flokken.
På plassen sprang ei jentegjeng på seks rundt og leika. Nokre av dei hadde vore innom tinghuset tidlegare på ettermiddagen, medan andre hadde stått ute og venta på at julegrana skulle tennast.
Slik samla bygda seg, først inne i tinghuset og deretter rundt det lysande juletreet, for å markere både opninga av det gamle huset i ny drakt og starten på årets julefeiring i Førde.
