nyhende
Valestrendingar vil støtta hjelparbeid i Ukraina og Gaza:
Opnar heimen for solidaritetsdag
Laurdag 10. august opnar Liv Marit og Einar Økland heimen sin på Valestrand for eit stort solidaritets-arrangement til inntekt for Norsk Folkehjelp sitt arbeid i Ukraina og Gaza.
– Å leva i fredelege Noreg gjer at me ofte gløymer konfliktane i andre land. Mange ukrainarar og palestinarar bur blant oss, og denne aksjonen gir oss ein sjanse til å bidra for å støtta heimlanda deira. Her er det mange gode krefter i sving for solidaritet, seier Liv Marit Økland.
Kulturprogram
Programmet for solidaritetsdagen omfattar musikk av artistar som Sigbjørn Apeland, Kjersti Berge, Egil Haugland, Kathrine Lunde Mackenzie, Magne Thormodsæter, Cecilie Anna og toradar-kvartetten Frynsegodene. Det blir opplesingar av forfattarane Einar Økland og Agnes Ravatn og teaterinnslag ved teatergruppa teARTig.
– Dette blir ein unik sjanse til å oppleva rik kultur samstundes som ein får bidra til viktig humanitært arbeid. Det er ei heilt spesiell atmosfære når me samlast slik i det vakre tunet. Det blir også rikhaldig kafé og aktivitetar for barn, så her kan ein ta med heile slekta, seier Jane Jünger og Håvard Tvedte på vegner av arrangørane.
Takksam for bidrag
Inntektene av arrangementet skal altså gå til Norsk Folkehjelp sitt arbeid i dei aktuelle landa.
– Me er takksame for at Liv Marit og Einar Økland opnar heimen sin for solidaritet på denne måten. Dette vil medverka til viktig hjelp både i Ukraina og Gaza, seier Susan Abdallah i Norsk Folkehjelp Sunnhordland.
