Ønskjer at Sveio tar del i flyplassdrifta

Bakgrunnen for at saka kjem opp er ein forvaltningsrevisjon av det interkommunale hamneselskapet Karmsund Havn IKS, kor Sveio kommune er ein av seks deltakarar. Revisjonen konkluderte med at det ligg utanfor føremålet til hamneselskapet å vera medeigar i Lufthavndrift AS.

Karmsund Havn IKS gjekk inn som aksjonær i selskapet Lufthavndrift AS i 2018. Bakgrunnen for dette var at det hadde oppstått ein akutt situasjon i selskapet då Widerøe Ground Handling AS trekte seg som investor. Det var då naudsynt å sikra det økonomiske grunnlaget for vidare operasjonell drift av lufthamna, heiter det i saksframlegget.

Står framfor to val

I kjølvatnet av revisjonen har regionrådet Haugaland Vekst har starta eit prosjekt for å få på plass ein ny eigarstruktur med blanda offentleg og kommunal eigarskap. Regionrådet har etablert eit prosjekt for å greia ut kva som er den beste løysinga. Styringsgruppa er sett saman av rådmann Vibeke Vikse Johnsen i Karmøy (leiar), kommunedirektør Ole Bernt Thorbjørnsen i Haugesund og rådmann Sigurd Eikje i Tysvær. Styringsgruppa får assistanse frå ei eiga administrativ prosjektgruppe.

Kommunane har ifølge framlegget to val i saka:

• 1. Ein kan endra vedtektene i Karmsund Havn IKS slik at eigarskapen i Lufthavndrift AS fell innanfor føremålet til selskapet.
• 2. Representantskapet kan vedta å be styret om å avhenda aksjane i Lufthavndrift AS. Ved dette alternativet må det finnast nye eigarar som kan tilføra selskapet kapital og sikra vidare drift og utvikling ved lufthamna.

Styret i Karmsund Havn IKS har gjeve uttrykk for at dei ønskjer at ein går vidare med alternativ 2. Dette fordi hamneselskapet har store investeringar framføre seg for å utvikla den tradisjonelle sjøretta hamneverksemda si, noko som vil krevja fullt fokus frå selskapet si leiing og selskapet sitt styre.

— Vidare utvikling av lufthamna vil difor bli best ivareteken av eit selskap med andre eigarar enn Karmsund Havn IKS, heiter det i framlegget.

Så langt tyder mykje på at det vil vera ei god løysing at selskapet som skal driva lufthamna vidare, får blanda kommunalt og privat eigarskap.

Sveio-rådmannen rår politikarane til å ta eigarskap i Lufthavndrift AS.

— Ei godt rutetilbod ved vår regionale lufthamn er avgjerande viktig for utviklinga av det lokale næringslivet og for attraktiviteten til området, heiter det i framlegget.

Krevjande pandemi

Det blir elles vist til at utbrotet av covid-19 blei ekstra krevjande for Lufthavndrift AS som knapt hadde kome i gang med utviklinga av den nye driftsmodellen då luftfarten i Noreg og internasjonalt på det næraste stoppa opp. Ein har difor enno ikkje sett kva utviklingspotensiale den alternative driftsmodellen for lufthamna har.

— Prosjektet som no er under utvikling etter initiativ frå regionrådet, er svært viktig for å sikra ei stabil og god drift ved lufthamna vår. I dette arbeidet er det viktig at Sveio kommune er ein aktiv deltakar, i og med at kommunen sine ibuarar er avhengige av at næringslivet i regionen har tilgjenge gode kommunikasjonar også innanfor luftfarten, konkluderer rådmannen.

Han meiner lufthamna er eit av dei viktigaste verkemidla for å nå Sveio kommune sin visjon om å ha vilje til vekst og vera ein god stad å leva.

Eigarkommunane i det interkommunale hamneselskapet Karmsund Hamn IKS er bedne om å gje attendemelding på om dei kan tenkja seg å vera direkte eigarar i lufthamnselskapet innan 31. januar.

Endeleg handsaming i eigarkommunane om eventuelt aksjekjøp vil bli handsama ei eiga sak. Det er ikkje klart kor stor eigardel kommunen vil få. Formannskapet i Sveio skal ta stilling til saka onsdag denne veka.