Nytt miljøfyrtårn på Ekrene

Verksemda kvalifiserte seg til miljøfyrtårn i februar.

– Viktig for offentlege tilbod

– For oss har dette mykje å seia, mellom anna når me skal leggja inn tilbod på oppdrag for det offentlege. Då kan miljøsertifisering telja opp til 30 prosent, seier dagleg leiar Bernt Johannessen i R. B. Johannessen AS.

Verksemda fekk nyleg ein rammeavtale med Haugesund kommune, og Johannessen meiner miljøsertifiseringa var sterkt medverkande til at dei vann dette tilbodet. I tillegg opplever han at det ved slike tildelingar blir lagt vekt på at firmaet har ein del elbilar i bilparken sin, saman med dei mest miljøvenlege bilane på fossilt drivstoff.

– For ei lita verksemd som vår var det heilt nødvendig å bruka miljøkonsulent for å gjennomføra sertifiseringa. Ho har gjort ein god jobb, og eg har lært mykje under vegs, seier han.

Seks private miljøfyrtårn

Dette er den sjette private verksemda i Sveio som har fått denne utmerkinga. Dei fem andre er Espira Solkroken AS, Førde Auto AS, Haugaland Storhusholdning AS, Haukås Bilverksted AS og Norsk Lek og Park AS. I tillegg er kommunehuset i Sveio, Sveio folkebibliotek og Klinikkområde Sveio/Bømlo, Vestland fylkeskommune tildelt miljøfyrtårn-diplomet.

Miljøfyrtårn er det mest brukte miljøsertifikatet her i landet. Krava for å sertifisera seg er at verksemda har gjennomført effektive og lønsame miljøforbetringar som også medverkar til å oppfylla FN sine berekraftmål.

I tillegg til å overrekka diplom, spanderte også ordføraren kake på dei tilsette.  R. B. Johannessen AS har 15 tilsette. Dagleg leiar er den einaste i administrasjonen.