Nye vegprosjekt gir inntil 25 nye arbeidsplassar i Sveio

Ølen Betong har inngått kontraktar for leveransar av betongelement til to store vegprosjekt. Den eine kontrakten er med entreprenøren Implenia Norge AS på E39 Lyngdal Øst – Lyngdal Vest, og den andre er med Hæhre Entreprenør AS for leveransar til E6 Kvithammar-Åsen i Trøndelag.

Leitar etter nye tilsette

Det er snakk om til saman 260.000 kvadratmeter med betongelement. Det svarar til 14.000 element, 80.000 tonn og 2.800 trailerlass.

For orden skuld: Alle elementa blir frakta frå Sveio til mottaksstad med båt, og deretter vidare til tunnel med trailerar opplyser selskapet i ei pressemelding.

— Kontraktane sikrar oss god aktivitet i usikre tider, og vi gleder oss til å kome i gang med leveranse samt utvide med fleire tilsette i Sveio, seier administrerande direktør Lars Norekvål.

Han fortel til Vestavind at dei i dag har om lag 15 tilsette i Mølstrevåg. Tidlegare har det vore rundt 40 tilsette på staden, og ifølgje Norekvål kan talet på tilsette kome opp mot 35-40 no.

Det er snakk om både produksjonsarbeidarar og leiarstillingar som skal fyllast.

— Me vil bemanne opp frå årsskiftet og utover neste år, seier han.

Ny djupvasskai

Det har vore liten aktivitet i marknaden dei siste par året, men Ølen Betong har nytta tid til å investere i utvida produksjonshall og djupvasskai i Mølstrevåg. Om lag 20 millionar kroner har det kosta til saman.

Regjeringa varsla at dei set bremsene på for fleire planlagde prosjekt framover då dei presenterte sitt forslag til statsbudsjettet sist torsdag. Men Ølen Betong-sjefen trur likevel det blir jobb i Mølstrevåg i mange år framover. Dei to siste kontraktane åleine gir full aktivitet i Mølstrevåg i eit og eit halvt år, og det er allereie nye prosjekt å rekne på framover for aktørane i bransjen.

— Berre Rogfast vil krevje rundt ein million kubikk betong, peikar han på.

Størst i Skandinavia

Ølen Betong, som har hovudkontor i Ølensvåg, har spesialisert seg på leveranse av betongelement til vatn, brann- og frostsikring av samferdsletunnelar. Anlegget i Mølstrevåg er det største i Skandinavia for produksjon til dette segmentet.

Selskapet har fram til no levert over tre millionar kvadratmeter med element til veg- og jernbanetunnelar.