nyhende
Ny måling: Auka skepsis til vindkraftutbygging over heile landet
Nesten annankvar nordmann seier nei til utbygging av vindturbinar i eigen kommune, viser ei ny undersøking InFact har gjort for Nationen.
– Eg er slett ikkje overraska over at folk har ein aukande skepsis mot vindkraft. Folk skjønner – og ser – i større grad enn tidlegare kva som kan komme i bakhagen deira. Folk begynner å vakne, seier Ragnhild Rajala Lautz, leiar av Folkeaksjonen mot Davvi Vindkraft, til Nationen.
Ei samanlikning av spørjeundersøkingar frå 2024 og 2025 viser at færre nordmenn no er positive til vindturbinar i eigen kommune. I 2024 støtta éin av tre utbygging, mens talet no har falle til éin av fire. Samtidig har motstanden auka frå snautt 43 prosent til nær 45 prosent.
Endringa er særleg tydeleg blant menn. I 2024 var nesten fire av ti menn positive til vindkraftutbygging i eigen kommune. Eitt år seinare er det færre enn tre av ti. Motstanden blant menn har auka kraftig, frå 43 prosent til nesten halvparten.
Det er store regionale forskjellar. I Oslo er støtta høgast, med 35 prosent som seier ja til lokal utbygging, mens 29 prosent seier nei. I resten av landet er bildet motsett. I Midt-Noreg og Nord-Noreg er 53 prosent motstandarar, mens berre 25 prosent støttar utbygging.
(©NPK)
