Ny fylkesveg mellom Krossleite og Buavåg vert sett på vent: — Katastrofe

I den regionale transportplanen (RTP) for perioden 2022 – 2033 ligg økonomiske midlar til ny veg mellom Krossleite og Grimstveit langt nede på prioriteringslista.

Utbetring av denne vegen er noko FrP ynskjer å framskunda. Dei meiner den planlagde investeringsramma for mellom anna fylkesvegar er for snever og ynskjer å auka vegløyvingane med éin milliard kroner dei neste fire åra, altså i den fyrste perioden frå 2023 – 2026.

Tysdag 24. mai var saka til handsaming i Hovudutval for samferdsle og mobilitet, men FrP sitt framlegg fekk ikkje fleirtal.

Dette inneber i praksis at vegen mellom Krossleite og Grimstveit ikkje vert økonomisk prioritert dei fyrstkomande åra.

— Ein katastrofe. Det har vore mykje frustrasjon knytt til denne vegen. Dette er ein nedtur for både grunneigarane i området og næringslivet, seier varaordførar Ruth Grethe Østebøvik Eriksen i Sveio FrP.

Ho meiner det er uproblematisk og fullt mogleg å setja av planleggingsmidlar til ny fylkesveg 541 før 2027.

— Det handlar om sterk nok vilje til å finna pengane og bruka dei riktig, men me vil kjempa vidare for å få fylkesvegen 541 høgare på den økonomiske prioriteringslista, understrekar Eriksen.

Saka skal opp att i Fylkestinget den 21. juni.