nyhende
Norske legar framleis negative til aktiv dødshjelp
Over éin av tre yrkesaktive legar i Noreg er heilt mot aktiv dødshjelp, medan nær ni av ti ønskjer reservasjonsrett viss det blir tillate, viser ei undersøking.
Studien viser at yngre legar og ikkje-religiøse legar er meir tilbøyelege til å støtte at det blir lovleg i Noreg med aktiv dødshjelp, samanlikna med eldre og religiøse kollegaer, skriv Legeforeininga i ei pressemelding.
Dødshjelp, som inkluderer både eutanasi og legeassistert sjølvmord, er ulovleg i Noreg i dag. Men det har vorte stadig meir debatt om tema i Noreg dei siste åra.
36,1 prosent av norske legar svarer at dei er heilt avvisande til å gjere aktiv dødshjelp lov i Noreg. 89,6 prosent svarer dessutan at dersom det skulle vorte lovleg, ønskjer dei retten til å nekte å utføre dødshjelp basert på eige samvit.
Ingrid Miljeteig, professor i medisinsk etikk ved Bergen senter for etikk og prioritering, maner til aktsemd med å bruke talmaterialet her som argument i ein debatt.
– Vi treng open dialog framfor polarisert debatt om dødshjelp. Dialog handlar om å utforske og forstå perspektiva til kvarandre, medan debatt handlar om å overtyde eller vinne ein diskusjon, skreiv ho i ein kommentar til originalartikkelen.
Undersøkinga vart publisert i Tidsskrift for Den norske legeforening og inkluderte svar frå 2004 yrkesaktive legar under 70 år, med ein svarprosent på 79,3 prosent.
(©NPK)
