Noregs dårlegaste fylkesveg skal kårast

– Politikarane har år etter år lova betre vegar. No får dei sjå kva folk over heile landet framleis må køyre på, seier direktør Øyvind Solberg Thorsen i Opplysningsrådet for veitrafikken (OFV).

Dei står bak kåringa og ber folk sende inn bilete og beskrivingar av dårlege fylkesvegar på norgesveier.no. «Vinnaren» blir kåra i august.

Bakgrunnen for kåringa er det stadig aukande forfallet på fylkesvegane, ifølgje Thorsen.

Ein rapport frå OFV viser at 39 prosent av fylkesvegane har dårleg dekkestandard. Verst står det til i Nordland, Vestland og Buskerud.

Statens vegvesen anslår at vedlikehaldsetterslepet på fylkesvegane ligg mellom 86 og 96 milliardar kroner. Likevel er det berre sett av under 500 millionar kroner i øyremerkte midlar i statsbudsjettet for 2025, påpeikar Thorsen.

OVF meiner sjølve systemet for fordeling av statlege midlar ikkje fungerer. I dag blir store delar av statlege midlar fordelte etter kor stort vedlikehaldsetterslepet er. Fylka som har dei dårlegaste vegane, får dermed mest pengar.

– Det er både dyrt og lite framtidsretta. Fylkeskommunane må få insentiv til å halde ved like i tide, ikkje vente til krisa er eit faktum. Det undergrev arbeidet med å sikre eit vegnett folk og næringsliv kan stole på, seier han.