nyhende
Noreg er Europas sjette dyraste land – her er det billigare
Å dra til Sverige er framleis lønnsamt, Danmark er enno klart dyrare enn Noreg, medan Sveits svir mest når mat og anna skal betalast.
– Prisnivået i Noreg samanlikna med resten av Europa synest å ha stabilisert seg på ein lågare forskjell enn før, og det har gjort det meir attraktivt for utanlandske turistar å leggje ferien sin her hos oss. Baksida av denne medaljen er at det har vorte dyrare enn før for nordmenn å feriere i utlandet, seier Espen Kristiansen, seksjonssjef i Statistisk sentralbyrå (SSB).
Ei oversikt over prisnivået i Noreg og andre europeiske land , viser at prisforholda landa imellom i 2024 heldt seg ganske stabile samanlikna med 2023. Det samla prisnivået i Noreg har i dei to siste åra lege 24 prosent høgare enn snittet i EU-landa, ifølgje dei nyaste tala frå Eurostat (ec.europa.eu).
Sveits og Island er enno landa med høgast prisnivå, med prisar høvesvis 74 og 62 prosent over EUs gjennomsnitt.
Dei billigaste ferielanda
Trass i høg prisvekst i Tyrkia, er dette enno landet i Europa med lågast samla prisnivå. Der var prisane 57 prosent lågare enn i Noreg i 2024.
Det er også rimeleg å feriere på Balkan, men prisane nærmar seg EU-snittet. Unntaket er Nord-Makedonia, der prisane var berre 55 prosent av EU-snittet i 2024. Bulgaria er Europas tredje rimelegaste land.
Tradisjonelle norske sommarferiedestinasjonar som Hellas og Portugal hadde i fjor prisar 13–14 prosent under snittet i EU. Spania var litt under 10 prosent rimelegare enn snittet, medan Tyskland og Frankrike låg rundt 10 prosent over snitt for prisnivåa. Italia ligg endå litt under gjennomsnittet i EU, men berre med nokre få prosent.
Svensken og dansken
Så er det alltid eit spørsmål om reisekostnader og -tid om ein skal på ferie. Då vil danmarks- eller sverigetur ha naturlege fordelar.
Også der har prisnivåa halde seg relativt stabile samanlikna med andre europeiske land. I Sverige låg prisane 7 prosent under dei norske i fjor, medan prisane i Danmark var 14 prosent høgare enn i Noreg.
For mange går ein stor porsjon av feriebudsjettet til mat og drikke. I fleire land vil desse nytingane opplevast som rimelegare enn heime, fordi Noreg har eit høgt prisnivå for næringsmiddel, samanlikna med snittet i EU.
Medan generelt prisnivå i Noreg er 24 prosent over snittet i EU-land, er mat 31 prosent dyrare. Det betyr at å ete ute enno kan opplevast som rimeleg i sjølv dyre land. Maten i Danmark var til dømes omtrent 8 prosent rimelegare enn i Noreg i fjor. I Sverige var mat 19 prosent rimelegare.
