nyhende
No skal gravplassen ved Eikeland kapell fornyast
Planane for utviding av gravplassen på Eikeland, som gir plass for gravlegging i 50-60 år framover er godkjent. Det blir også parkeringsplass.
Det er estimert at gravplassen ved Eikeland kapell, som blei tatt i bruk i slutten av 1950-åra, er full i slutten av 2022. I hovudsak er det dei som er busett i Auklandshamn som bruker denne gravplassen, i snitt har det etter år 2000 vore fem gravferder årleg på Eikeland.
Minnelund
Utvidinga gir plass for 201 kistegraver og 45 urnegraver. I kvar urnekrav kan det setjast ned fire urner. I tillegg kjem minnelund, med plass til å setja ned 145 urner.
Kor lenge utvidinga vil dekka behovet framover vil vera avhengig av gravferdstradisjonar framover, men det er anslått av dette vil halda i 50-60 år framover, om ein reknar med ei viss grad av gjenbruk av graver, og utan store endringar i tradisjonane.
Parkering
Parkering er òg ei utfordring, som det no skal gjerast noko med. Det skal kjøpast tilleggsareal på om lag 400 kvadratmeter til parkeringsplass sør for kapellet, til ein kostnad av 15 000 kroner. 18 bilar vil få plass på den nye p-plassen.
Anbod vil truleg bli lyst ut til hausten, med byggjestart på nyåret 2022, og ferdigstilling til sommaren 2020. Kostnadsramma for prosjektet er 5,69 millionar kroner.
