nyhende
No kan utenlandske statsborgarar søka om nasjonalt ID-kort
Fram til 2. desember innfører politiet gradvis bestilling av nasjonalt ID-kort for utanlandske borgarar i alle politidistrikt. I vårt distrikt er Haugesund med frå oppstarten.
Utlendingar med statsborgerskap frå eit EØS-land eller EFTA-land, og som har norsk fødselsnummer, kan dermed søka om norsk ID-kort utan reiserett. ID-kortet kan brukast som legitimasjon i Noreg og dokumenterer vedkommande sitt norske fødselsnummer, skriv Sør-Vest politidistrikt i ei pressemelding.
Haugesund først
Målet er at EØS/EFTA-borgarar skal få mogelegheit til å søka om ID-kort i alle politidistrikt innan utgangen av 2025. Politidirektoratet har bede om at eitt pass- og ID-kontor skal peikast ut til oppstart. I Sør-Vest er det Politiets forvaltningssenter i Haugesund som har fått tildelt oppgåva.
– Bakgrunnen for at lokasjonen i Haugesund er valt er at dette er den einaste staden i politidistriktet der me har samla kompetanse på utlendings- og forvaltningssaker, seier Mina Rød, leiar for felles eining utlending og forvaltning.
Stiller krav til søkar
Førebels er det borgarar frå land innan EØS eller EFTA som kan søka om ID-kortet. Etter kvart vil tenesta også bli tilbydd tredjelandsborgarar, men det er ikkje avklart når dette skjer. Tredjelandsborgarar er borgarar frå land som ikkje er del av EØS eller EFTA.
– Politiet sine nettsider inneheld god informasjon om kven som har mogelegheit for å få ID-kort, og kva ein bør sjekka før ein bestiller time. Det er eksempelvis eit krav at namnet som står oppført i folkeregisteret må vera heilt likt namnet som står i passet som er utstedt i vedkommande sitt heimland, seier Rød.
