nyhende
No blir det bøter til dei som køyrer utanom bomsystemet til ferja
Det skjer stadig oftare at reisande ikkje betaler på ferjesambandet Halhjem-Sandvikvåg. No blir det tatt grep for å få bukt med problemet.
– AutoPASS finst på alle våre 16 riksvegferjesamband. Det er den reisande sjølv som er ansvarleg for å passere registreringspunktet korrekt og ha gyldig elektronisk betalingsmedium (AutoPASS-brikke eller skiltgjenkjenning) etter forskrift om transport med ferje, seier seniorrådgjevar Marte Sørø på ferjeavdelinga i Statens vegvesen, i ei pressemelding.
Tatt på fersken
Det er Torghatten Nord som opererer sambandet på vegner av Statens vegvesen. Ferjemannskapet opplever at bilistar vel å køyre utanom AutoPASS-registreringa, og at dei dermed bevisst unnlet å betale ferjebilletten.
– Ferjemannskapet har ved fleire tilfelle tatt reisande på fersken, seier driftssjef Reidar Fredriksen i Torghatten Nord Bjørnafjorden. Dette resulterer i at dei aktuelle sjåførane må betale ei tilleggstakst på 2100 kroner – i tillegg til ordinær ferjebillett.
Skannar køyretøy
Torghatten Nord har no starta å skanna køyretøya på bildekket for å kontrollere korrekt betaling. Er det køyretøy som har kjørt utanom AutoPASS-systemet, blir det no avdekt gjennom skanning på bildekk, og det blir skrive ut tilleggstakst.
Statens vegvesen vil også setja inn tiltak på øvrige riksvegferjesamband for å kontrollera at det blir tatt betalt for samtlege køyretøy om bord.
