Næringsforum med god driv

— Eit velfungerande næringsforum er viktig av mange grunnar. Først og fremst for å vera med å skapa vekst i næringslivet og skapa fleire arbeidsplassar. Men også opp mot kommunen i til dømes arbeid med arealplan, næringsplan og andre ting som opptek medlemmene våre, seier Matre.

Eit resultat av godt samarbeid med med kommunen, er vedtaket om straumstøtte til næringslivet som kom i desember.

Å representera næringslivet i Sveio regionalt og nasjonalt, har også vore viktig for styret det første året.

— Me er deltar mellom anna i Sunnhordlandsrådet, omdømeprosjektet Bu i Sunnhordland og Kompetanseforum Sunnhordland, seier Matre.

Framsnakking og samarbeid

Arbeidet blir gjort på dugnad, og heile styret bidrar, understrekar Matre. Ho er glad for at så mange som vel 50 har blitt medlemmer i løpet av det siste året, og at stadig fleire kjem til.

— Jo fleire me blir, dess sterkare står me i forhold til viktige ting for medlemmene. Det er eit spanande næringsliv i Sveio med mange flinke folk. Næringsforumet er eit nettverk for alle næringsdrivande, og bidrar til at næringslivet blir meir synleg. Me må vera flinke til å framsnakka kvarandre, og samarbeida. Det er kjempeviktig, seier Matre.

Ho peikar særleg på nytta av eit næringsforum når det skjer større endringar i samfunnet.

— Det skjer mykje no. Til dømes det grøne skiftet og alt det vil føra med seg. Her må me henga med, og toget går no. Næringsforumet vil kunna vera både eit talerøyr og hjelp til bedriftene, seier Matre.

Næringsfrukostar- og samlingar

Næringsfrukostar og næringssamlingar har treft godt i året som har gått. Både med fagleg innhald og det å treffa andre næringsdrivande på ein utformell måte.

— Me prøver å fanga breidda blant medlemmene i tema me tar opp. Dette har vore så vellukka at me held fram med tilbodet i år også. Første næringsfrukost blir mai, seier Matre.

På den siste næringsfrukosten i fjor blei den den nye nettsida til Sveio næringsforum presentert.

— Den er framleis under utvikling, men er oppe og går. Her kan både medlemmer og andre finna nyttig informasjon. Som alle medlemsbedriftene våre, hendingar og nyhende. Sveio har mange vegar, og det er difor kjekt å kunne synleggjere bedriftene på nettsida vår på kart, slik at ein raskt kan sjå kvar i Sveio bedriften er lokalisert, seier Matre.

Ope møte for alle før årsmøtet

Tysdag er det årsmøte. Det første ordinære årsmøtet sidan 2016. Men først er det ope møte der alle med interesse for næringsliv er velkomne. Mellom anna med foredrag om regionbygging og næringsutvikling, Sveio som regional brubyggar og korleis legga til rette for å trekka til seg ny næringsverksemd.

— Me gler oss til årsmøtet og håper mange kjem både der og på den opne delen. Der blir det også ein debatt mellom foredragshaldarar og deltakarane, og gode pausar til å strekka på beina og mingla, seier Matre.

Sjølve årsmøtet blir sett på slutten av kvelden, og er for medlemmer i næringsforumet.