Nå blir det ein bank mindre i Sunnhordland

Avtala, som regulerer hovudpremissa knytt til ein samanslåing, vart samrøysta vedtatt av styra i dei to bankane, heiter det i ei melding til Oslo Børs.

— Sparebanken Vest og Etne sparebank er i dag to sterke og lokalt forankra sparebankar, med ei rekke likheiter i profil, og med dels overlappande marknadsområde i Sunnhordland. Bankane har i det eit sterkt produktsamarbeid gjennom selskapa Frende, Brage og Norne. Samanslåinga vil skape meirverdi for kundar og lokalsamfunna i Etne og Vindafjord. Samanslåinga vil skape grunnlaget for ein langsiktig satsing i regionenm, til nytte for privatkundar og næringslivskundar, heiter det i meldinga.

Forvaltningskapital inkludert utlån for den samla banken, inkudert utlån overfært til Boligkreditt, vil vere på 240 milliardar kroner. Etne vil etter samanslåingen vere eit av 35 kontor i Sparebanken Vest.

— Ei god løysing

— For Etne Sparebank er ei samanslåing med Sparebanken Vest ei god løysing, fordi Sparebanken Vest tilbyr ei totalpakke som vil ivareta verdiane som er bygd opp i Etne, seier banksjef i Etne Sparebank, Rune Ramsvik:

– Sparebanken Vest kan tilby Etne Sparebank sine kundar ei komplett bankpakke. Sparebanken Vest har høg kundetilfredsheit, svært gode digitale løysingar og etablerte rutinar for å ivareta samfunnsfunksjonen gjennom gåvemidlar. Dette vil kome lokalsamfunnet i Etne og Vindafjord til gode. I tillegg vil noverande kundar i Etne få ta del i overskotet gjennom kundeutbytte på lån og innskot, seier han i ei pressemelding.

Etne-kontor består

Etter avtalen vil Sparebanken Vest vere overtakande bank og namnet på den samanslåtte banken vil vere Sparebanken Vest. Kontoret i Etne vil bestå, i det same bygget som før, medan hovudkontoret vil ligge i Bergen. Den nye eininga vil framleis ha ei sterk forankring som lokal sparebank, og bygge vidare på den solide posisjonen som Etne Sparebank har etablert i området.

Vederlaget for samanslåinga er satt til 320 millionar kronar. 80 prosent av oppgjeret vil skje gjennom ei utsteding av nye eigenkapitalbevis i Sparebanken Vest (SVEG), medan 20 prosent av vederlaget vil skje som kontantar.

– Vi ser fram til å ønske kundar og tilsette i Etne velkomne til oss. Samanslåinga viser at Sparebanken Vest er en attraktiv partner for framtidige samanslåingar i sparebanksektoren, seier konsernsjef Jan Erik Kjerpeseth i Sparebanken Vest.

Avtalen om samanslåing vil bli behandla i generalforsamlingane i bankane 23. mars. Avtalen er og betinga av nødvendige godkjenningar frå myndigheiter og kontraktspartar på akseptable vilkår.

Etter foreløpig tidsplan, er det planlagt gjennomføring av samanslåinga hausten 2022.