nyhende
Musikk og dikt i Bua
Sveio folkebibliotek held litteraturarrangement rundt om i bygdene som del av eit prosjekt. Torsdag vert det musikk og dikt frå Hans Gunther Bonenberger på Sjøhuset i Buavåg.
— Me har invitert Hans Gunther Bonenberger til å lesa frå si andre diktsamling, seier Kristine Thorkildsen.
Som sjef for Sveio folkebibliotek er ho glad for å kunne setja opp nok eit arrangement i prosjektet som heiter «litteratur i gamle hus». Sjølv har dei kalla det for «Dikt og Kaffigodt».
— Det skal vera i gamle hus. Det er ein viktig del av prosjektet, seier Thorkildsen.
Samarbeid
Difor har dei samarbeida med Sveio Gullforeining om å bruka Sjøhuset i Buavåg.
På torsdag 11. mai skal Bonenberger få både lesa og spela musikk, og Thorkildsen håpar folk tek turen.
Ho er glad for at prosjektet gjev dei mogelegheit til å bringa litteraturen rundt i bygdene.
— Me håpar det å reisa rundt i kommunen gjer at dei i nabolaget kan kome og rusla bort, seier Thorkildsen.
Valenheimen neste
Totalt skal dei ha ni arrangement i prosjektet som strekk seg over to år. Biblioteket har fått 50.000 kroner frå Nasjonalbiblioteket i stønad. Kvar gong vil det vera i eit eldre hus utanfor biblioteket, og gjerne med ein sveibu som gjest.
— Me er veldig glade for å arrangera noko med lokale folk, seier Thorkildsen.
Neste arrangement vert til hausten lengre nord i kommunen.
— Då skal me til Valenheimen og snakka om rosene der, seier ho.
