nyhende
— Me har brent våren inn
Med gårsdagens skogbrannøving ynskte Haugaland brann og redning våren velkomen: — Dette er eit vårteikn som er like sikkert som at vipa kjem, russen hoiar og slankeråda inntek avisene, seier brannsjef Dag Botnen.
(Sjå bilete nedst i saka).
Måndag sette brannmennene i Sveio fyr på store mengder vegetasjon i området Landsåt mellom Ryvarden og Lyngholmen.
Det høyrest kanskje dramatisk ut, men skal ifølgje brannsjef Botnen ha gått fint føre seg.
— Me har brent våren inn, skriv han til Vestavind.
Heile 250 mål med kystlynghei vart brende. Det tilsvarer 250.000 kvadratmeter.
Brannsjefen meiner dette er eit godt tiltak i reguleringa av vegetasjon. Ved å halda buskas og kratt nede, vert det dessutan vanskelegare for ein potensiell brann å spreia seg.
— Dette er ein gamal tradisjon som skal halda kystlandskapet i hevd, og sveibuen er synonym med tradisjon, presiserer Botnen.
Skogbrannøvinga frå gårsdagen gjer brannmannskapen i Sveio endå meir førebudd på å handtera brannsituasjonar i framtida.
