nyhende
Mattilsynet: Vern fuglane dine mot fugleinfluensa
Når trekkfuglane vender tilbake, oppmodar Mattilsynet fuglehaldarar til å vera nøye med smittevern og avgrensa kontakten med ville fuglar.
Det er for tida mykje fugleinfluensa blant ville fuglar i Europa. I vinter har det vore mange påvisingar av høgpatogen fugleinfluensa (HPAI) hos villfugl i Noreg, skriv Mattilsynet i ei pressemelding.
– Viktig å ta smitten på alvor
– Det høge smittepresset blant ville fuglar både i Noreg og i Europa gjer det ekstra viktig at alle som held tamme fuglar, både kommersielle aktørar og hobbyfuglehaldarar, tek smitten på alvor, seier Elisabeth Nissen Nordbye, seksjonssjef for dyrehelse i Mattilsynet.
– Hald fuglane skilde frå ville fuglar for å verna dei mot smitte, legg ho til.
Fugleinfluensa er ein svært smittsam sjukdom for fuglar, og smitten skjer hovudsakleg gjennom avføring eller dropesmitte frå luftvegane.
Gode råd
Trass i stor smitte hos ville fuglar over heile landet, har det ikkje vore utbrot i norske fjørfehald sidan september 2025.
Ifølgje Mattilsynet smittar fugleinfluensa svært sjeldan frå fugl til menneske. Likevel tilrår dei:
- Ikkje ta på sjuke eller døde fuglar.
- Ikkje ta med fuglar heim for å stella dei.
- Meld frå til Mattilsynet dersom du finn sjuke eller døde fuglar.
